Рособрнадзор орто анал үөрэх I кууруһун устудьуоннарын билиитин таһымын чинчийиэҕэ
Үөрэх уонна наука эйгэтин кэтээн көрөр федеральнай сулууспата орто анал үөрэх тэрилтэлэригэр I кууруска киирбит устудьуоннар уопсай үөрэхтээһиҥҥэ билиилэрин хаачыстыбатын чинчийэн көрүөҕэ диэн Рособрнадзор саайтыгар суруллар.
Ол курдук саайтка сурулларынан, устудьуон аатын сүкпүт эдэр дьон нуучча тылыгар, математикаҕа, историяҕа уонна омук тылыгар билиилэрин таһымын чинчийэн көрөллөр үһү.
Ол түмүгэр, бастакы куурус устудьуоннара математика да, социальнай-култуурунай хайысха даҕаны өттүгэр буоллун, аныгы уопсастыба ирдэбиллэригэр төһө эппиэттэһэллэрэ, бэлэмнээхтэрэ көстүөхтээх үһү.
“Бу чинчийии 9-с кылаас кэнниттэн кэллиэстэргэ, техникумнарга кэлэр оҕолор билиилэрин таһымын көрдөрүөҕэ. Инникитин иккис, үһүс куурустар устудьуоннарын билиилэрин бэрэбиэркэлиир итиэннэ орто анал үөрэх кыһаларыгар үөрэнэр сылларыгар ылбыт уопсай үөрэхтээһиҥҥэ билиилэрэ төһө хаҥыырын бэрэбиэркэлиир былааннаахпыт”, — диэн Рособрнадзор салайааччытын солбуйааччы Анзор Музаев иһитиннэрбит.
Чинчийиигэ Арассыыйа 64 эрэгийиэнин 545 орто анал үөрэҕин тэрилтэтин 50 тыһ. устудьуона хабыллыаҕа диэн ыйыллар. Итинтэн 11 % орто анал үөрэх бырагыраамалаах үрдүк үөрэх тэрилтэлэрэ эбит. Түмүгү сыл бүтүүтэ ахсынньыга таһаарыахтара.
Биһиги корр., «Саха сирэ» хаһыат, edersaas.ru