“Роснефть” Саха сиригэр 75 млрд куб. м тахса саппаастаах саҥа баайдаах сири арыйда
Саҥа баайдаах сир ханна арылынна? Манна ааҕыҥ.
“Роснефть” ньиэби-гааһы хостуур комплекска киирэр “Таас-Юрях Нефтегазодобыча” хампаанньа Саха сиригэр 75 млрд куб. м тахса саппаастаах саҥа баайдаах сири арыйда, диэн “Роснефть” пресс-релиһигэр этиллэр.
“Роснефть” ньиэби-гааһы хостуур комплекска киирэр “Таас-Юрях Нефтегазодобыча” хампаанньа Аллараа Дьэрбитээҕи лицензиялаах учаастакка скважинаны үүттүүр кэмигэр саҥа гаас конденсаттаах сири арыйда. Судаарыстыба хамыыһыйатын балаансатыгар саппааһынан 75 млрд куб. м тахса гаас уонна 1,4 мөл туонна гаас конденсата киллэрилиннэ”, — диэн иһитиннэриигэ этиллэр.
Исписэлиистэр арыллыбыт баайдаах сир бородууксуйаны биэрэр кыахтааҕын уонна салгыы чинчийиини ыытарга тоҕооостооҕун бэлиэтээтилэр.
Саҥа баайдаах сир Аҕа дойду Улуу сэриитин дьоруойдарыттан биирдэстэрин Иван Николаевич Кульбертинов аатынан сүрэхтэннэ.
“Таас-Юрях Нефтегазодобыча” – “Роснефть” хампаанньата, үлэтин Саха сирин сиригэр-уотугар лицензиялаах уон учаастагар ыытар. Тэрилтэ Киин блокка уонна Орто Ботуобуйатааҕы ньиэптээх-гаастаах сир Куруҥнааҕы лицензиялаах учаастагын баһылааһынынан дьарыктанар.
ТАСС
Бэлэмнээтэ Женни Стрюкова
Хаартыска: тустаах саайтан.