Билиҥҥи ыччат дэгиттэр сайдыылаах, киэҥ билиилээх, бэйэтигэр эрэллээх. Кини кэнэҕискини кэбиһиэ, саргылаах сарсыҥҥыны салайсыа диэн тураммын, интэриэһинэй ыалдьыты билиһиннэрэбин. Бүгүн 2021 сыллаахха ыытыллыбыт ыччат бырайыактарын Арассыыйатааҕы куонкуруһун кыайыылааҕа Владимир Прокопьевы кытта кэпсэттим:
— Владимир, ааҕааччыларбытыгар Росмолодежь диэн тугун быһаарыаҥ дуо?
— Росмолодежь диэн ыччаты өйүүр уонна сайыннарар сыаллаах Федеральнай ааҕыныстыба буолар. Идиэйэлэри уонна бырайыактары сайыннарарга төһүү күүһү биэрэр.
— Эн бырайыаккын олоххо киллэрэн сылдьаҕын. Ол туһунан сырдатыаҥ дуо?
— Мин бырайыагым аата «Оцифровка памятников исторического наследия Великой Отечественной войны» диэн. Сахабыт сирин хас биирдии нэһилиэгэр Аҕа дойду Улуу сэриитигэр кыргыспыт, кыайыыны уһансыбыт дьоҥҥо пааматынньыктар бааллар дии. Биһиги Дьокуускай куорат, Жатай бөһүөлэгин, Нам, Уус Алдан, Мэҥэ Хаҥалас, Чурапчы, Таатта, Томпо, Хаҥалас улуустарын пааматынньыктарын оцифровкалаабыппыт. Ютуб ханаалга видеолары уһулан укпуппут. Хаартыскалар «Яндекс Хаартаҕа» уонна местопамяти.история.ру саайтка киирбиттэрэ.
— Кырдьык, улахан уонна суолталаах үлэ оҥоһуллубут. Холобур, ыччат идиэйэлээх. Ол эрээри, салгыы тугу гыныан билбэт. Ханна сигэнэн, тайанан көрүөхтээҕий?
— Сөптөөх ыйытыы. Дьиҥэр, олус судургу. Чопчу сыаллаах, тугу гынарын билэр ыччат бэйэтэ булар, көрөр. Росмолодежь сигэтин баттаан, хайдах быһыылаахтык үлэ ыытылларын, оҥоһулларын сиһилии манна көрүөн сөп.
Владимир Прокопьев кэпсэтиибит түмүгэр: «Ыччат тоҕо бырайыактары суруйарый? Туһалааҕы, үйэлээҕи оҥороору, олоҕу кэрэ өттүгэр уларытаары, тупсараары. Мин санаабар, граннарга үлэлэһэр, идиэйэтэ, бырайыага олоххо киириэн баҕарар ыччат, бастатан туран, дьарыгын ис сүрэхтэн таптыахтаах. Сөбүлүүр эрэ дьыалаҥ тупсаҕайдык табыллар. Биллэн турар, кыра ыарахаттар баар буолуохтарын сөп. Ол эрээри, дьаныардаах киһи ол онтон толлубат, иннин диэки баран иһэр».