Олунньу 13 күнүгэр тыа хаһаайыстыбатын федеральнай ааҕыныстыбатын салайааччытын солбуйааччы Николай Кротов Дьокуускайга кэлэн Рослесхоз мунньаҕын ыытта. Мунньах быыһыгар тыа баһаардарын туһунан суруналыыстар ыйытыктарыгар хоруйдаата.
Николай Кротов, тыа хаһаайыстыбатын федеральнай ааҕыныстыбатын салайааччытын солбуйааччы:
«Уһук Илин түөрт эрэгийиэнигэр тыа баһаардарын умулларыыга сылдьыспыт дьоҥҥо иэстээхпит. Ол курдук, Амурскай уобаласка, Еврейскэй автономнай уобаласка, Хабаровскай кыраайга уонна Саха Өрөспүүбүлүкэтигэр. Билигин тыа хаһаайыстыбатын федеральнай ааҕыныстыбата баһаардар тустарынан матырыйааллары бэрэбиэркэлээн бүтэрэн эрэр. Ол кэннэ Арассыыйа бырабыыталыстыбатыгар иэстэри төлөһөр хадатаайыстыба түһэриэхпит».
Саха Өрөспүүбүлүкэтин бырабыыталыстыбатын бэрэссэдээтэлин бастакы солбуйааччы Алексей Колодезников иһитиннэрбитинэн, тыа баһаардарын умулларыыга Рослесхоз Саха сирин иннигэр 328 мөл. солк иэстээх. «Ити баһаары умулларыыга сылдьыбыт дьоҥҥо уонна авиа хампаанньаларга төлөнүөхтээх харчы. Ити кыһалҕа суһаллык быһаарыллыах тустаах«,— диэн Алексей Колодезников бэлиэтээтэ.
Сыл аайы тыа баһаарыгар үлэлээбит дьоҥҥо хамнастарын сыл кэриҥэ уһатан баран төлүүллэрэ үгэс буолаары гынна. Кэлин баһаар буолар түгэнигэр, умулларыыга үлэлиир дьону булар ыарахаттардаах буолуон сөп. Ол иһин Саха Өрөспүүбүлүкэтин салалтата тыа баһаарын умулларыытыгар быһаччы федеральнай бүддьүөттэн үп көрүллэр ньыматын олохтооҥ диэн этии киллэрбитэ ыраатта.
Николай Попов, «Саха сирэ» хаһыат, edersaas.ru