РФ Росгвардиятын федеральнай сулууспатын Саха сиринээҕи управлениетыгар быйыл бөрүкүтэ суох күһүн буолла. Кини полицейскайдара кыттыылаах, буолаары буолан, киһи өлүүлээх, икки суол быһылаана таҕыста. Иккиэннэрэ – Дьокуускай куоракка. Быйыл онто да суох суолга киһи өлүүлээх элбэх быһылаан таҕыста. Онуоха быраабы араҥаччыылыыр уорганнарбыт бэйэлэрэ эбиискэ буолбуттара хомолтолоох.
Бастакы быһылаан бу дьыл балаҕан ыйын 24 күнүгэр, түүн 01.30 мүн. саҕана, киин куорат Киров-Поярков уулуссаларын быһа охсуһууларыгар тахсыбыта. Онно Росгвардия управлениетын «УАЗ-31519» массыыната уонна «Toyota Allion» харсыспыттара. Ол түмүгэр, «Тойотаҕа» олорсон испит кыыс суорума суолламмыта.
Ити чахчынан силиэстийэ уорганнара РФ Холуобунай кодексатын 264-с ыст. 3-с чааһынан, ол эбэтэр, суол быраабылатын кэһии түмүгэр, киһини сэрэҕэ суохтан өлүүгэ тиэрдии бэлиэтэ баарынан, холуобунай дьыала тэрийбиттэрэ. РФ Росгвардиятын Саха сиринээҕи управлениета бэйэтин үлэһиттэригэр сулууспанан бэрэбиэркэ саҕалаабыта. Билигин силиэстийэ бара турар.
Бу быһылаан тахсаатын, сонуннары киэҥник тарҕатар ситимнэргэ маҥнай утаа маннык иһитиннэрии тилийэ көппүтэ: Росгвардия «УАЗ» массыынатыгар ОМОН нэрээтэ айаннаан испит, оттон иномаркаҕа – «Индрайвер» такси сулууспатын суоппара. Бу таксист кыыс Лермонтов уулуссатыттан (паарка диэкиттэн) үс киһини олордон, куорат киинин диэки айаннаан иһэн, светофор күөх уотугар ааһан истэҕинэ, туох да сигнала, уота-күөһэ («мигалката») суох «УАЗ» массыына соһуччу тахсан кэлэн түспүт.
Росгвардия управлениетын пресс-сулууспата онно биэрбит официальнай иһитиннэриитинэн, балаҕан ыйын 24 күнүгэр, түүн 01 чаас 12 мүнүүтэ Дьокуускай куорат полициятын дьуһуурунай чааһыттан иһитиннэрии киирбит. Богатырев уулуссатыгар охсуһуу буола турарын, онно Росгвардия көмөтө наадатын туһунан.
Ол быһылааҥҥа ОМОН байыастарын ыыппыттар. Кинилэр «УАЗ-Хантер» массыыналара ирдэбил быһыытынан, анал уоттара-күөстэрэ уонна тыастара холбонон, суһаллык айаннаабыттар. Ити суол быһылааныгар ОМОН түөрт байыаһа эмсэҕэлээбитэ, кинилэртэн биирдэстэрэ реанимацияҕа киирбит этэ.
Росгвардия управлениетын пресс-сулууспата бүгүн биһиги сайтпытыгар анаан иһитиннэрбитинэн, омоновецтар төрдүөн балыыһаттан тахсыбыттар – биир киһи моонньугар гиипсэлээх, «больничнайын» саппыт, үс киһи таһыттан сылдьан эмтэнэр.
Оттон Росгвардия массыыната сиренатын, «мигалкатын» холбоон испит дуу, холбооботох дуу диэн мөккүөрдээх түгэҥҥэ «Саха» НКИХ ити уулуссаларга турар тэрилтэ дьиэтиттэн уһуллубут видеокамера устубут эксклюзивнай видеотын көрдөрөн бигэргэппитэ.
Бу видеоҕа көстөрүнэн, «УАЗ» автовокзал диэкиттэн Поярков уулуссатынан «маячога» умайа-умайа түп-түргэнник айаннаан иһэр.
Иккис быһылаан бу дьыл алтынньы 13 күнүгэр, бээтинсэҕэ таҕыста.
СӨ ИДьМ-тын ГИБДД пропагандаҕа отдела иһитиннэрбитинэн, ааспыт бээтинсэҕэ, күрүлүүр күнүс, Дзержинскэй уулуссатыгар турар 15 №-дээх дьиэ тэлгэһэтигэр Росгвардия Тас тэрилтэлэри харабыллыыр биэдэмистибэтин (ОВО) «УАЗ-Патриот» массыыната 88 саастаах эмээхсини түҥнэри көттө. Эмсэҕэлээччи «суһал көмө» массыынатыгар тыына быстыбыт.
23 саастаах суоппар арыгы испэтэх, өлүөр өйдөөх эбит.
Росгвардия управлениетын пресс-сулууспата:
– Дзержинскэй уулуссатыгар буолбут суол быһылаана управление Тас тэрилтэлэри харабыллыыр (ОВО) «УАЗ-Патриот» массыыната кыттыылаах тахсыбытын бигэргэтэбит. Билигин бу чахчынан сулууспанан бэрэбиэркэ бара турар. Өскөтүн суоппар буруйдааҕа быһаарылыннаҕына, бу сотрудник мөлтөх өрүттэринэн («по отрицательным мотивам») ууратыллыаҕа.
СӨ ИДьМ-тын пресс-сулууспата:
– Бу чахчынан сити күн, алтынньы 13 күнүгэр, РФ Холуобунай кодексатын 264-с ыст. 3-с чааһынан, ол эбэтэр, суол быраабылатын кэһии түмүгэр, киһини сэрэҕэ суохтан өлүүгэ тиэрдии бэлиэтэ баарынан, холуобунай дьыала тэриллибитэ.
Вера МАКАРОВА, «Саха сирэ» хаһыат, edersaas.ru
Хаартыска: http://crimyakutia.ru/
Видео: http://nvk-online.ru