Росгвардия сотрудниктара буруйдары арыйдылар

Ааптар: 
Бөлөххө киир:

Биллэрин курдук, бу дьыл муус устар 5 күнүгэр дойду бэрэсидьиэнин Ыйааҕынан РФ Национальнай гвардиятын войскаларын федеральнай сулууспата диэн тэриллибитэ. Биһиги өрөспүүбүлүкэбитигэр нацгвардия управлениета баар буолбута. Управление сотрудниктара бу күннэргэ хас да буруйу «сылааһына» арыйдылар. 

Түөкүннээһин. Дьокуускай куорат полициятын дьуһуурунай чааһыгар түөкүннээһиҥҥэ уорбаланар дьахтар ориентировката киирбит. Буруй киин куорат Аппа Уҥуор (Залог) оройуонугар биир дьиэҕэ оҥоһуллубут — уорбаланааччы биир дьахтары албыннаан, хараҥа кугас өҥнөөх нуорка саҕынньаҕын ылан барбыт. Килиэккэ ырбаахылаах, халлаан күөҕэ джинсы ыстааннаах уорбаланааччы эдэр дьахтар халлаан күөҕэ «иномаркаҕа» олорсон, көтүтэ турбут.

Ол массыынаны полицейскайдар аҕыйах мүнүүтэнэн туппуттар — таксист дьахтар ханнык аадырыска тахсыбытын эппит. Онтон ол аадырыска Росгвардия харабыллааһыҥҥа салаатын автопатрула ойутан тиийбит. Бу тиийбит бөлөҕү салайааччынан полиция старшината, хас да айдааннаах дьыалалары арыйыыга кыттыбыт Юрий Заровняев (хаартыскаҕа ортоку турар) сылдьыбыт. Хас биирдии квартираны кэрийэн, ол уорбаланааччы дьахтары булбуттар. Дьахтар сону билэр киһитигэр биэрбитин билиммит. Бу чахчынан холуобунай дьыала тэриллэрин туһунан боппуруос көрүллэр.

Наркотикка сыһыаннаах буруй. Дьокуускай куорат Якутскай уулуссатыгар баар биир дьиэтин таһыгар турар омук массыыната полиция старшай сержаннара Владислав Рожин уонна Николай Ермолаев болҕомтолорун тардыбыт. Бу «Тойота Ипсум» массыына иһин бэрэбиэркэлээһин түмүгэр сиэрэй өҥнөөх веществолаах сигаретаны уонна ол вещество сыстыбыт күлүүһүн булбуттар. 33 саастаах уорбаланааччыны наркодиспансерга илдьибиттэр, оттон былдьаммыт веществону экспертизаҕа ыыппыттар.

Төлөпүөнү уоруу. Онтон Росгвардия Мэҥэ Хаҥаластааҕы салаатын сотрудниктара уорууну «сылааһына» арыйдылар. Харабыллыыр биир маҕыһыыннарыттан сигнал киирээтин, аҕыйах мүнүүтэнэн онно тиийбиттэригэр, атыылааччы дьахтар кини суотабай төлөпүөнүн уорбуттарын кэпсээбит. Уорууга уорбаланааччы ориентировкатын бары автопатрулларга ыыппыттар. 10 мүнүүтэнэн  ол киһини туппуттар — итирик туруктаах киһи «Ремикс» маҕаһыыҥҥа тиийэн эрэр эбит. Кинини атыылааччы дьахтар тута билбит. Ол киһи кууркатын сиэбиттэн уоруллубут төлөпүөнү булбуттар. Уорбаланааччы быһаарбытынан, таах сытар төлөпүөнү, атыылааччы аралдьыйбыт кэмигэр, сойбоппут. Атыылаан, арыгы ылыныам дии санаабыт. «Уоруу» ыстатыйанан көрүллэр холуобунай буруй бэлиэтэ баар.

Атын киһи дьиэтигэр киирии.  Нерюнгри оройуонун Чульман бөһүөлэгэр биир киһи дьиэтигэр сарсыарда 07.00 чаас саҕана итирик киһи киирбитин туһунан сигнал киирбит. Ыйыллыбыт аадырыска полиция прапорщига Юрий Никитин уонна старшина Роман Удовиченко-Арыштаев тиийэн, ол киһини отделга тутан аҕалбыттар. Ити дьиэҕэ хайдах тиийэн хаалбытын бэйэтэ да өйдөөбөт итирик киһи ити дьиэ хаһаайыныныын биирдэ көрсө сылдьыбытын кэпсээбит. Ханна да хонор сирэ суох буолан, ити дьиэҕэ хаһан эрэ сылдьыбытын өйдөөн, ааны алдьатан киирээтин, Росгвардия полицейскайдара тутан ылбыттар. Бу киһи дьайыыларыгар РФ Холуобунай кодексатын 139-с ыстатыйатынан көрүллэр буруй  бэлиэлэрэ бааллар.

Вера МАКАРОВА, edersaas.ru

Хаартыскалар: Росгвардия управлениетын пресс-сулууспата. 

+1
0
+1
0
+1
0
+1
0
+1
0
+1
0
+1
0