РФ Росгвардиятын федеральнай сулууспатын Саха сиринээҕи управлениетыгар бэлиэ түгэн буолла — сэттэ саҥа массыына эбилиннэ.
Бу массыыналар күлүүстэрин Росгвардия харабыллааһын отделын полицейскайдарыгар туттарыы Дьокуускай куорат Комсомольскай болуоссатыгар буолла. Манна харабыллааһын отделын нэрээттэрэ эрэ буолбакка, ОМОН, СОБР анал подразделениелара эмиэ кытыннылар.
Ааспыт 2017 сыл түмүгүнэн, бастыҥ үлэлээх салаанан Чурапчы улууһун харабыллааһыҥҥа отдела буолбут. Бу отдел начальнигын эбээһинэһин быстах кэмҥэ толорор старшай лейтенант Дмитрий Варламовка управление начальнига, полиция полковнига Сергей Челищев «УАЗ Патриот» массыына күлүүһүн туттарда.
Ону тэҥэ, «Лада» массыына күлүүһэ Мэҥэ Хаҥаластааҕы отдел начальнигын эбээһинэһин быстах кэмҥэ толорор полиция майора Леонид Варламовка туттарылынна.
Начальник Сергей Челищев инструктаж ыытан баран, ситиһиилээх үлэни баҕарда.
Бу туһунан РФ Росгвардиятын федеральнай сулууспатын Саха сиринээҕи управлениетын пресс-сулууспата иһитиннэрдэ.
Биһиги корр., «Саха сирэ» хаһыат, edersaas.ru
Хаартыска: РФ Росгвардиятын федеральнай сулууспатын Саха сиринээҕи управлениетын пресс-сулууспата.
