Росавтодор салайааччытын солбуйааччы федеральнай суолларга үлэ хаамыытын көрдө
Росавтодор салайааччытын солбуйааччы федеральнай суолларга үлэ хаамыытын көрдө.
Уһук Илиҥҥэ айанын чэрчитинэн Роман Новиков Р-297 “Амур” Чита-Хабаровскай уонна А-360 “Өлүөнэ” Невер-Дьокуускай федеральнай массыына суолларын өрөмүөнүн, хапытаалынай өрөмүөнү уонна саҥардан оҥорууну көрдө.
Быйыл Федеральнай суол ааҕыныстыбатыгар бас бэринэр “Уһук Илин” суол тэрилтэтэ “Амур” Р-297 суолун 12 учаастагар өрөмүөн үлэтин ыытар. Росавтодор баһылыгын солбуйааччы Сковородинскай оройуоҥҥа Невер сэлиэнньэтин таһыгар 1014-1024 км суол учаастагын көрдө. Манна суол бэлиэлэрин уонна сэрэтэр остуолбалары уларыталлар, суол ньуурун көннөрөллөр. Бу үлэни алтынньы бүтүүтүгэр түмүктүөхтээхтэр.
Роман Новиков маны сэргэ А-360 “Өлүөнэ” массыына суолугар Тында оройуонугар сырытта. Билигин манна “2024 сылга диэри магистральнай инфраструктураны саҥардыы уонна кэҥэтии кэлимсэ былаана” национальнай бырайыакка киирбит икки учаастакка үлэ барар.
Бастакы учаастакка Байкал-Амур ыллыгын нөҥүө 168 км уонна 169 км Тында өрүс муостатын нөҥүө ыытыллар. Суол устатын тухары суол үлэһиттэрэ бетонтан оҥоһуллубут харгыстыыр күрүөнү уонна тротуардары оҥоруохтара. Куттал суох буоларын туһугар сырдатыы үлэтигэр болҕомтону ууруохтара. Эбийиэги 2021 сылга үлэҕэ киллэриэхтэрэ.
63-93 килэмиэтирдэргэ учаастагы тутуу түмүктэнэр. Манна массыыналар ааһалларыгар сөптөөх усулуобуйа оҥоһуллубут. Ол курдук, 10 муостаны, ууну аһарар 30 турбаны уонна тимир аарканы оҥорбуттар. Бу эбийиэк 2020 сыл алтынньытыгар үлэҕэ киириэхтээх.
Оробуочай сырыытын иккис күнүгэр Росавтодор баһылыгын солбуйааччы А-360 “Өлүөнэ” федеральнай массыына суолун түөрт учаастагар эбийиэктэр бэлэмнэрин көрдө.
Нерюнгри оройуонугар Росавтодорга киирсэр “Өлүөнэ” суол управлениета А-360 трасса 436-441 килэмиэтирдэригэр учаастагы өрөмүөннээтэ. Исписэлиистэр үс хаттыктаах асфальт-бетон араҥатын уурдулар, ууну аһардар 7 турбаны олортулар. 22 суол бэлиэтин, 83 сигналлыыр остуолбаны туруордулар.
Алдан оройуонугар 506-613 килэмиэтирдэргэ уонна 513-517 килэмиэтирдэргэ тупсаҕай оҥоруу үлэтин ыыттылар. Маны сэргэ 702-712 км учаастагы хапытаалынай өрөмүөннээһин түмүктэнэр эрэр.
Бүгүҥҥү туругунан трасса устатын тухары гравий алдьаныытын туоратыы буолар. Кэнники биэс сылга гравийтан асфальт-бетоҥҥа көһөрүү үлэтэ ыытыллар, онон 2024 сылга диэри 240 км аспаалланыахтара. Росавтодор баһылыгын солбуйааччы бу бырагырааманы өйүүрүн эттэ. Ити суол-ыллык былаһын тухары куттала суохтук уонна “көнө ньуурунан” айанныырга төһүү буолуоҕа. Түмүгэр, кини национальнай барыл соруктарын толорор туһугар суол саахалыгар түбэһэн өлүүнү аччатыыга суол үлэһиттэрэ кыһаллан туран үлэлиэхтээхтэрин ыйда.
Сахагов саайтан
Бэлэмнээтэ Женни Стрюкова
Хаартыска: тустаах саайтан