Росавтодор 2017 сылга Саха сиригэр федеральнай таһымнаах «Өлүөнэ» (А-360), «Бүлүү» (А-331) уонна «Халыма» (Р-504) суолларга 429 км уһуннаах учаастактары өрөмүөннүөхтээҕин туһунан федеральнай суол агентствотын салайааччытын солбуйааччы Андрей Костюк СӨ бырабыыталыстыбатын бэрэссэдээтэлэ Евгений Чекин салайааччылаах дэлэгээссийэни кытта көрсүһүүтүгэр эттэ.
Кэлиҥҥи кэмҥэ тустаах федеральнай тэрилтэ үс сүрүн суолу бары ирдэбилгэ сөп түбэһэр гына оҥорууга улахан болҕомтотун уурар. Андрей Костюк этэринэн, Росавтодор кэлэр өттүгэр «Өлүөнэ» суол бары учаастага аныгы технологиянан оҥоһуллан, барыта асфальт бетонунан бүрүллүөхтээх. Бастакы уочарат 63-с биэрэстэттэн 93-с биэрэстэҕэ диэри кэрчик саҥардыллан оҥоһуллуоҕа. Итинтэн хаалбыта кэлэр үс сыл устатыгар үмүрүтүллүөҕэ.
«Бүлүү», «Халыма» суоллары оҥорууга саҥа технология быһыытынан «ресайклинг» ньыма туһаныллыаҕа. Бу ньыма өрөмүөн ороскуотун 15-20 % кыччатар уонна үлэ барыытын тэтимирдэр.
Ресайклинг ньыма. Эргэ суол үрдүнээҕи араҥата матырыйаал быһыытынан туһаныллар. Анал ресайклер диэн тиэхиньикэ суол үрүт араҥатын кыһыйан ылар. Ол үнтү мэһийиллэр уонна онно тута цемени эбэтэр битуму (эмульсия) кытта буккуллан, төттөрү суолга кутуллан, асфальт курдук дэхсилэнэр. Маннык ньыманан оҥоһуллубут суол ууну аһарбат (герметичнэй) буолан, быдан бөҕө уонна адаархайа суох буолар. Ити – бастакыта. Иккиһинэн, маннык технологиянан суолу оҥоруу сыаната биллэрдик чэпчиир эбит.
2017 сылга федеральнай бүддьүөттэн өрөспүүбүлүкэ улуустарыгар баар суоллары оҥорууга үп көрүллэрэ тохтообот. Бу сыалга федеральнай бүддьүөттэн өрөспүүбүлүкэ суолун пуондатыгар 234 мөл. солк. көрүллүөҕэ. СӨ бырабыыталыстыбатын бэрэссэдээтэлэ Евгений Чекин федеральнай кыттыһан үбүлээһинтэн өрөспүүбүлүкэ суолталаах суолларга баар эргэ муосталары саҥардан оҥорууга үп наадатын эттэ. Итини тэҥэ, өрөспүүбүлүкэ суолун тутааччылара Росавтодор салалтатыгар өрөспүүбүлүкэ таһымнаах «Амма» суол учаастагын оҥорууга техническэй-экономическай былааны бэлэмнээн киллэрэллэрин эттилэр. Салгыы ити былааны олоххо киллэрэргэ судаарыстыбаннай бүддьүөттэн субсидия көрүллэрин туруорсарга сайаапка бэриллиэҕэ.
«Бүлүү» суолун управлениетын начаалынньыга Николай Андреев:
– Анал бырагыраама чэрчитинэн, ааспыт сылга 80 км уһуннаах учаастагы уонна 500-чэ м уһуннаах муостаны, ууну аһардар турбалары оҥорон үлэҕэ киллэрбиппит.
Быйылгы былаан улахан. «Бүлүү» федеральнай суолга 200 км уһуннаах суолу өрөмүөннүөхпүт, оҥоруохпут. Ол курдук, суол 16 учаастагар өрөмүөн ыытыллыаҕа, биэс муоста уларытыллыаҕа, 22 ууну аһардар турбалар туруоруллуохтара. Хапытаалынай өрөмүөн быһыытынан быйыл суол түөрт учаастага оҥоһуллуоҕа. Балары олоххо киллэрэргэ анал бырагыраама чэрчитинэн, 3,6 млрд солк. көрүлүннэ.