Куһаҕантан киһи да күлэр — дьон отой ымыр да гыммакка, таах «ааһан иһэн» тугу барытын уорарыттан. Ону полиция оперативниктара арыйбыт уорууларыттан көрүөҕүҥ.
Үөһээ Халымаҕа 56 саастаах киһиттэн «Буранын» сыарҕатын уорбуттар. Онто 10 тыһ. солк. сыаналаах эбит. Оперативниктар бу уорууга уорбаланааччылары түргэнник туппуттар: бу 39 уонна 32 саастаах дьон ити киэһэ атастарын кытта арыгылаабыттар.
Онтон аһаан-сиэн бүппүттэрин кэнниттэн дьахталларыттан биирдэстэрэ аттынааҕы микро-оройуоҥҥа илдьэн биэрэллэригэр көрдөспүт. «Романтичнай» эр дьон дьахтар көрдөһүүтүн быһа гынымаары, биир «Бураҥҥа» бары баппаттарынан сибээстээн, аттынааҕы ыалтан сыарҕаны уорбуттар уонна дьахтары дьиэтигэр илдьэн биэрбиттэр.
Оттон Тиксиигэ биир киһи кыбартыыратыттан аһын-үөлүн уорбуттар. Тутуллубут урут сууттана сылдьыбыт 38 саастаах уорбаланааччы полицейскайдарга быһаарбытынан, кини итирэн баран, билэр киһитэ олорор дьиэтин подъеһыгар киирбит уонна биир кыбартыыра аана бэрт мөлтөхтүк хатанан турарын өйдөөн көрбүт.
Өр толкуйдуу барбакка, ааны алдьатан киирэн, холодильникка баар аһы ылан, икки этээһинэн аллара олорор билэр киһитигэр киирбит. Уорбут аһын сол киэһэ сиэбит.
Үөһээ Бүлүүгэ уоруу сиэртибэтинэн 40 саастаах дьахтар буолбут. Киниттэн харчытын уорбуттар. Оперативниктар бу уорууга уорбалаан, урут сууттана сылдьыбыт 42 саастаах дьахтары туппуттар.
Дьыала маннык буолбут эбит: дьахталлар уулуссаҕа көрсүбүттэр уонна бииргэ маҕаһыыҥҥа барбыттар. Биир түгэҥҥэ эмсэҕэлээччи дьахтар малларын ити түөтэҕэ көрөрүгэр этэн баран, тэйэ хаампыт. Ол кэмҥэ уоруйах дьахтар кини суумкатыттан 10.600 солк. сойбоппут.
Онтон Мэҥэ Хаҥалас полициятыгар Майа сэлиэнньэтин 40 саастаах олохтооҕо даачатыттан малларын уорбуттарын туһунан сайабылыанньа киллэрбит.
Бу уорууга уорбаланан, Чурапчыттан төрүттээх урут сууттана сылдьыбыт 36 саастаах киһи тутуллубут.
Сабаҕалааһын быһыытынан, бу киһи иччитэх даача дьиэлэрин анаан-минээн көрдөөбүт уонна биир оннук дьиэни булан баран, түннүгүн алдьатан иһирдьэ киирбит. Ол киирэн, утуйар мөһөөччүгү уонна тэллэҕи уоран тахсыбыт.
Бу чахчыларынан холуобунай дьылалар тэриллибиттэрин СӨ ИДьМ-тын пресс-сулууспата иһитиннэрдэ.
Биһиги корр., «Саха сирэ» хаһыат, edersaas.ru
Хаартыска: интэриниэттэн