Олоҕо киниэнэ арылхай, сулуһа киниэнэ чаҕылхай (доҕорбут Иосиф Романов кэриэһигэр)
Иосиф Дмитриевич Романов биһиги ортобутуттан букатыннаахтык барбыта үс сыл буолла да, ону өйбүтүнэн-санаабытынан ылыныахпытын баҕарбаппыт. Чугас дьонун, доҕотторун, кэллиэгэлэрин cоhутан, эмискэ бараахтаабыта.
Устудьуоннуу сылдьыахпытыттан, 30-тан тахса сыл доҕордоспут эрэллээх табаарыспытын, уонунан сылларга сарын-сарыннарбытынан өйөһөн бииргэ үлэлээбит кэллиэгэбитин, өрөспүүбүлүкэ араас оройуоннарыгар үгүс ахсааннаах эбийиэктэри тутан дьэндэппит улахан буукубаттан суруллар Тутааччыны сүтэрбиппит.
Көҕүлээччи, түмээччи, салайааччы буоларга «айылҕаттан айдарыылаах» киһи диэн кини этэ. Иосиф Дмитриевичтиин алтыспыттар кини бэйэтин тула дьону-сэргэни түмэр, этэн-тыынан, толкуйдаан таһааран араас дьыалаларга, тэрээһиннэргэ өрүкүтэн кытыннартыыр кыахтааҕын, талааннааҕын өрүү астына бэлиэтииллэр. СГУ-га инженернэй-тиэхиньиичэскэй факультекка үөрэнэр кэммитигэр солбуллубат ыстаарыстабыт этэ. Спортивнай күрэхтэһиилэр, тутар этэрээттэр, култуурунай-сынньанар тэрээһиннэр, айылҕаҕа тахсыылар кини тэрээһининэн ыытыллаллара, кинитэ суох сатаммат этибит. Барытыгар кыаллан, устудьуон күргүөмнээх олоҕун ортотугар сылдьара.
Чаҕылхай түгэннэр элбэхтэрэ. Уоhук айылҕаттан айдарыылаах күүстээх спортсмен этэ. Факультетын чиэһин көмүскээн, мэлдьи күрэхтэһиилэргэ кыттара. Биһиги сахалыы «Алҕас» диэн ааттаах футболга хамаандабыт саамай кэлиҥҥи миэстэттэн саҕалаан, Дьокуускай куорат футболга лигаларын ассоциацияларын икки төгүллээх чөмпүйүөнүнэн буола үүнэн-сайдан тахсыбыта. Хамаандабыт аатын интэриэһиргээн ыйыттахтарына, Уоhук үгэһинэн мичээрдии-мичээрдии: «Алҕас хоттордубут эбэтэр алҕас кыайдыбыт», — диэн быһаарара. Доҕорбут теннискэ идэтийэн оонньуура, футболу олус сөбүлүүрэ, хонууга бары балаһыанньаҕа — вратарынан, көмүскээччинэн, кимэн киирээччинэн да оонньуур кыахтааҕа. Бары дистанцияларга сүүрэрэ, сүрдээх көхтөөх, эрчимнээх волейболист бэрдэ этэ.
Устудьуоннуу сылдьан хас да сыл «Адгезия» тутар этэрээккэ бииргэ үлэлээбиппит. Уоhуктуун үлэлиир астык этэ, үгүһү сатыыра, биһигини үөрэтэрэ. Сакаасчыктары кытта эйэ дэмнээхтик, дьыалабыайдык, нэмнэрин булан, икки өрүккэ көдьүүстээх кэпсэтиини ыытара. Мэлдьи саныыбыт, өйдүүбүт: 1990 сыллаах сайын Бүлүү куоракка спортивнай сааланы тутан баран, төһө да сылаарҕаатарбыт, үлэбит түмүгүнэн астынан, дэлби харааччы салгыҥҥа сиэтэн кэлбиппит. Оттон бэйэтэ да хара бараан Уоhукпут олох кубинец курдук куудараабай, хап-хара, тиистэрэ эрэ маҥхаһаллар…
Үтүөлэрин, идэтинэн хаачыстыбатын туһунан этэ да барыллыбат. Кини мэлдьи үрдүкү таһымҥа этэ: Саха сирин бочуоттаах тутааччыта, «Тутууга үтүөлэрин иһин» уордьан кавалера, өрөспүүбүлүкэ тутуутун комплексын бэтэрээнэ. Үгүспүт кинини кытта устудьуоннуу сылдьан тутар этэрээппит аатынан ааттаммыт «Адгезия» тутуу хампаанньатыгар бииргэ үлэлиир дьолломмуппут.
Иосиф Дмитриевич дириэктэри бастакы солбуйааччынан үлэлээбитэ. Кини салалтатынан социальнай суолталаах бөдөҥ эбийиэктэр: Нам сэлиэнньэтигэр 200 көрдөрөр миэстэлээх поликлиника, Нам, Үөһээ Бүлүү сэлиэнньэлэригэр 300 миэстэлээх стадионнар тутуллубуттара, Саха Өрөспүүбүлүкэтин норуоттарын спортивнай оонньуулара ыытыллыбыттара. Саха сиригэр түөртүү сыл буола-буола ыытыллар ити күрэхтэһиилэргэ кыттыбыт спортсменнар күрэхтэһэргэ олус табыгастаах, үрдүк хаачыстыбалаах оҥоһуулаах стадионнар диэн астына сыаналаабыттара. Күн бүгүн ити стадионнарга дьон-сэргэ кыратыттан улаханыгар, оҕотуттан кырдьаҕаһыгар тиийэ үөрэ-көтө эрчиллэллэр. Ол аата, кини үлэтэ таах хаалбата, дьоҥҥо-сэргэҕэ туһалыыр. Ол буолар, тутааччы дьоло диэн.
Итини сэргэ, Иосиф Дмитриевич өрөспүүбүлүкэ устун үгүс оҕо уһуйааннарын, оскуолалары, олорор дьиэлэри тутууну салайбыта. Кини тиһэх туппут эбийиэгинэн Дьокуускай куоракка доруобуйаларынан хааччахтаах оҕолору чөллөрүгэр түһэрии киинэ буолар. Бассейннаах, оннооҕор сылгылары тутар көньүүһүнэлээх, аныгы тэрилинэн толору хааччыллыбыт Кииҥҥэ инбэлиит оҕолор доруобуйаларын туругун көннөрүнэллэр, эмтэнэллэр.
Үтүө киһи туһунан өйдөбүл мэлдьи тыыннаах. Биһиги Уоhукпут кылгас эрээри, чаҕылхай олоҕу олорон ааспыта. Кини туппут сырдык тутуулара дьоҥҥо-норуокка өссө да уһуннук туһалыахтара. Успуорка бэриниилээх киһи быһыытынан, тутуу хампаанньаларын икки ардыларыгар сыллата тэриллэр спартакиаданы олохтообута. Успуорт түмэр, сомоҕолуур күүстээҕин Уоhук билэрэ. Сүүһүнэн тутааччылар түмүллэн, сыллата бэйэлэрин хампаанньаларын чиэһин мини-футболга, волейболга, буулдьанан ытыыга, теннискэ, бильярдка, боулиҥҥа, саахымакка көмүскүүллэр. Тутааччылар спартакиадалара кини сырдык аатынан ыытыллар уонна саҥаттан-саҥа кыттааччыларынан хаҥыыр.
Биһигини доҕорбутун кытта олоххо үгүс түмэрэ, дьиэ кэргэннэринэн доҕордоһорбут, ол да иһин Уоhукпутун мэлдьи суохтуубут. Кини дьиэ кэргэнигэр – тапталлаах кэргэнэ Лидия Николаевнаҕа, кыыһыгар Дашаҕа хайдахтаах ыараханын тылынан кыайан этиллибэт, биһиги өрүү бииргэбит…
Доҕорбут Иосиф Дмитриевич Романов сырдык аата үйэлэргэ мэлдьи тыыннаах буолуо!
Дьиэ кэргэнинэн доҕотторо: Валентина, Алексей Барашковтар,
Мария, Афанасий Былгаевтар, Надежда, Платон Васильевтар,
Анна, Альберт Жирковтар, Варвара, Виссарион Ивановтар,
Лена, Ньургун Климовтар, Людмила, Михаил Охлопковтар,
Тюркана, Валерий Сергеевтэр, Айталина, Егор Сивцевтэр,
Елена, Сергей Сивцевтэр, Анастасия, Айсен Эверстовтар.