Бүгүҥҥүттэн «Триумф» Спорт киинигэр сахалартан бастакы олимпийскай чөмпүйүөн Роман Дмитриев кэриэһигэр уолаттар ортолоругар көҥүл тустууга VI норуоттар икки ардыларынааҕы турнир хапсыһыылара саҕаланнылар. Бастакынан көбүөргэ 57, 65, 74, 86, 97 кг диэри ыйааһыннаахтар таҕыстылар.
Тустууну сэҥээрээччилэр үгэс быһыытынан чэпчэки ыйааһыҥҥа тустар уолаттарбытыгар эрэҥкэдийэ санаабыттара кураанахха буолла — уон тоҕус бөҕөспүтүттэн, хомойуох иһин, хайалара да финал аҥарыгар тиийбэтэ.
Кадеттар ортолоругар аан дойдуга бастыыр иһин күрэхтэһии боруонса призера Петр Константиновпыт үһүс эргииргэ, полуфиналга тахсар иһин хапсыһыыга Ахмед Идрисовка (Дагестан) 6:3 ахсаанынан хотторон кэбистэ.
Үгүстэр ини-бии Петр уонна Алексей Копыловтарга эрэнэ санаабыттар да, уолаттарга аан дойду түһүлгэтин кыайыылаахтара дьиэтээҕи көбүөрдэригэр «кыһыл көмүстэн» эмиэ көрө маттылар. Петр иккис эргииргэ Гулможон Абдуллаевка, оттон Алексей финал аҥарыгар тахсар иһин күөн көрсүһүүгэ Андрей Гатаулиҥҥа баһыйтардылар
Онон бу сибилигин аҕай 57 киилэҕэ диэри ыйааһыҥҥа финал аҥарыгар З.Хамитов (Казахстан) А.Идрисовы (Дагестан) итиэннэ Ч.Монгуш (Тыва) А.Гатаулины (Бурятия) туһуннулар.
Бастаан Ахмед Идрисов утарылаһааччытын 10:0 ахсаанынан хотто. Иккис паараҕа кыайыылааҕынан Андрей Гатаулин таҕыста— 10:6.
Эрэхтээх уонна кыайыылааҕы быһаарар түмүк хапсыһыылар сарсын, кулун тутар 3-гэр, субуотаҕа, буолуохтара.
Роман Попов, «Саха сирэ» хаһыат, edersaas.ru