Сунтаарга уматык кэмигэр тиэрдиллибэккэ, тыҥааһыннаах балаһыанньа үөскүү сырытта. Ол эрээри үөскээбит кыһалҕа тута быһаарыллан, «РНГ» АУо Сунтаар сэлиэнньэтигэр 150 туонна ньиэби тиэйэн аҕалла.
Туһааннаах хампаанньа сунтаардарга утары баран, кэмигэр уматыгынан хааччыйбатаҕа буоллар, сэлиэнньэҕэ баар социальнай суолталаах 40-тан тахса эбийиэккэ ититии арахсыа эбитэ буолуо. Эрдэтинэ атын бэдэрээтчити кытары дуогабардаспыттара, онтулара кэмигэр уматыгы тиэйбэтэх. Инньэ гынан, Сунтаар сэлиэнньэтин баһылыга Эдуард Филиппов суһаллык Москваҕа тиийэн атын поставщиктары булан, «РНГ» ААУо бэйэтин күүһүнэн ньиэби тириэрдибит.
Санатан эттэххэ, «РНГ» хампаанньа Орто Ботуобуйатааҕы ньиэп, гаас конденсаттаах сиригэр үлэлиир. Орто Ботуобуйа Сунтаартан 440 км сиргэ баар. Өрүс хаайбатаҕына, улууска 6 – 7 чааһынан тиийэллэрин туһунан хампаанньа пресс-сулууспата кэпсээтэ.
Ыспыраапка
«РНГ» АУо (АО «РНГ») EASTSIB HOLDING хампаанньалар бөлөхтөрүн иһинэн 2003 сыллаахха тэриллибитэ. 2010 сылтан Орто Ботуобуйатааҕы ньиэп, гаас конденсаттаах сири чинчийиигэ уонна хостооһуҥҥа лицензиялаах. Сүрүн офистара Москваҕа баар.
Анивера Акимова, «Саха сирэ» хаһыат, edersaas.ru