Дьокуускай куорат салалтатын уонна социальнай харалтатын сыллааҕы былааннарыгар “хайаан даҕаны” диэн суруллубатах, ол эрэн, куруук ыытыллар тэрээһининэн Өлүөнэ очуостарыгар бэтэрээннэри күүлэйдэтии буолар.
edersaas.ru
Кырдьыга даҕаны, бэтэрээннэр дойду туһа диэн кыргыһыы хонуутугар киирсибиттэрин эбэтэр сэрии урусхалын кэнниттэн дойдуну чөлүгэр түһэрии туһугар туругуран туран үлэлээбит үтүөлэрин бэлиэтээн туран, бэлэх буолан бэриллэр кэрэ түгэн тосхойуутун үөрүүнэн ылыналлар.
Тэрийээччилэр сүрүн соруктарынан бириэмэни таба туһанан, сынньалаҥ араас көрүҥүн тэрийии буолар. Холобур, быйыл ридикюль куонкуруһа, КВИЗ-оонньуу, дуобат, саахымат турнира, викторина уо.д.а. ыытылыннылар.
Ридикюль, нуучча тылын тылдьытын быһаарыытынан, Арассыыйаҕа 1790 с. диэкиттэн баар буолбут. Сүрүн уратытынан тигиллэр матырыйаала хайаан да таҥас буолуохтаах эбит. Кэлин олоҕу кытта тэҥҥэ хаамсан, сыыйа көрүҥэ да, матырыйаала да уларыйан, күн бүгүҥҥү көрүҥүн ылыммыт.
Ридикюль көрүүтүгэр 8 кэрэ аҥаар кытынна. Бары да дьоһун олоҕу олорбут далбардар. Дьэ, суумкаларбыт бэйэ-бэйэлэригэр майгыннаспаттара тэрийээччилэри да, көрөөччүлэри да астыннарда. 1950-с сыллардааҕы ридикюль хаһаайката суумкатын иһигэр сэбиэскэй солкуобайдардааҕа сэргэхсийиини таһаарда. “Солкуобайга тугу атыылаһар этибитий?” — дии санаан ыллыбыт. Дьоппуон омук ридикюль суумката (Александра Ефимова) тигэргэ-оҥосторго судургута уонна билиҥҥи кэмҥэ олус тоҕоостооҕо сөхтөрдө. Ордук сиэбэ суох таҥастаах буоллахха, олохпут арахсыбат аргыһа буолбут сотовай төлөпүөммүтүн угарга табыгастаах. Эбэтэр биир ридикюль чөлүгэр түһэриллэн, саҥа тыын ылан, “билиҥҥи олоххо эргэҕин, олохтон хаалбыккын” диэн антах анньыллыбакка сылдьара көлүөнэ ситимин туоһутунан буолла. Санаан да көрдөххө, хаһан эрэ маҥнайгы хамнаһыгар атыыласпыт суумкатын ХХI үйэ сиэнэ илдьэ сылдьара долгутуулаах да, киэн туттуулаах да буоллаҕа.
Ридикюль наадалаах, туһалаах мал буоларын тэҥэ, өссө биир аналынан дьахтар толору уобараһын арыйар. Саха далбара хабах, сарыы, тирии, сукуна, солко, хаарыс таҥас суумкалара дьыалабыай эбэтэр киэһээҥҥи таҥаска барсыбаттар. Оттон уобараһын аайы таҥаһа-саба, сирэйэ-хараҕа, атын да аксессуардара уларыйан иһэр Клара Захарова ытыс тыаһын ылыан ылла.
Ытык сааска үктэммит Анна Волкова уонна Анна Иванова эҥинэ бэйэлээх сахалы кыра суумкалары көрдөрдүлэр уонна өссө төгүл саха дьахтара барахсан дэгиттэр талааннааҕын өссө төгүл итэҕэттилэр. Ити курдук, хас биирдии ридикюль туспа сыаллаах-соруктаах, суоллаах-иистээх буолан биэрдэ.
Суумкалар хаһаайкалара кимнээҕий? Анастасия Петрова, Вера Мачахова, (»Сэрии сылын оҕолоро» уопсастыбаннай тэрилтэ), Александра Петровна, Клара Васильевна (Хатас түөлбэлэрин салайааччылара), Лидия Лисакович, Мария Иванова (Октябрьскай уокурук бэрэстэбиитэллэрэ).
“Саха сирэ” хаһыат, edersaas.ru сайтка анаан Наталья РУФОВА.