Хатас нэһилиэгин олохтоохторун хартыыналара »Үргэл» Арт-галереяҕа турдулар.
edersaas.ru
Хартыыналарбыт анал уоттаах-күөстээх, анал стендэлэргэ турдулар. Быыстапканы оҥоро үөрүйэхтээх үлэһиттэр хартыыналары өҥ-дьүһүн дьүөрэлэһиитин (тардыылааҕын) быраабылатын тутуһан ыйаталаабыттарыгар, санаабытыгар, хартыыналар өссө тупсубут курдуктар.
Бу хартыыналары айбыт дьон ойуулуур-дьүһүнннүүр искусствоҕа туох да анал үөрэҕэ суохтар, арай сүрэхтэрин баҕатынан уруһуйдууллар.
Биир дойдулаахпыт Федот Макаров: “Ойуулуур-дьүһүннүүр искусствоҕа саамай чулуу учуутал – айылҕа”, — диэн эппитин чопчутук өйдөөн хаалбыппын. Кырдьыга да, өҥ арааһа, эгэлгэтэ, эриэккэһэ — айылҕаҕа, үрүҥ- хара мөккүөрэ — айылҕаҕа, сылаас, тымныы алтыһыыта эмиэ айылҕаҕа буоллаҕа. Бу — кэһиллибэт, суруллубатах сокуоннар… Ол да иһин буолуо, »Үргэлгэ» турбут үлэлэр баһыйар үгүс өттүлэрэ айылҕа араас көстүүтүн, туругун уо.д.а. көрдөрөллөр.
Дьэ, хартыыналары ким суруйар эбитий?
Манна бааллар: хаан-уруу бииргэ төрөөбүттэр, бииргэ үөрэммиттэр, бииргэ үлэлээччилэр. Кинилэр эмчит, учуутал, ааҕар-суоттуур, газооператор идэлээхтэр.
Быыстапкаҕа турар үлэлэри Саха Өрөспүүбүлүкэтин норуодунай, Арассыыйа үтүөлээх худуоһунньуга Юрий Спиридонов сүүмэрдээбитэ. Ол кини »Үргэлгэ» турар үлэлэр таһымнарын түһэрбэт туһугар биир уталыйбат усулуобуйатынан буолар. Инньэ гынан, биһиги, тэрийээччилэр, үлэлиир үлэбит хайысхата үүнэр-сайдар суолга чиҥник үктэммит дуу диэн тутум үрдээн сылдьабыт. Онно барытыгар куруһуокпут эдэркээн салайааччылара
Анна Ефремова, Акулина Шелковникова, Дарья Андреева көмө, тирэх буолаллар. Кинилэргэ махталбыт муҥура суох. Үһүөн үөрэтэр ньымалара, тус буочардара майгыннаспаттар. Ол эрэн, үлэлэрин түмүгэ, о.э. биһиги хартыыналарбыт ааттаах-суоллаах дьон сыанабылларын ыллылар. Биллэн турар, билигин да үлэлиэххэ, ситэриэххэ, бүтэриэххэ-оһоруохха, тупсарыахха диэтэххэ, элбэх үлэ күүтэр. Этэргэ дылы, иннибитигэр киэҥ нэлэмэн аартык аһылынна.
Быыстапкабыт турарын тухары “Саха” көрдөрөр-иһитиннэрэр тэрилтэ араас биэриилэригэр уһулан көрдөрдө, кэпсээтэ. Инньэ гынан, үйэтитии да үлэтэ барда.
Быыстапка сабыллыытын ырытыы мунньаҕынан түмүктээтибит.
Өрөспүүбүлүкэтээҕи норуот айымньытын дьиэтин салайааччыта Сергей Семенов аатыттан Махтал суруктары бастыҥ үлэлээх Татьяна Попова, Октябрина Лазарева туттулар. Иккиэн да умсугуйан туран суруйбут, астынан туран айбыт ураты, уйан тыыннаах үлэлэрдээхтэр. Сүбэ, ырытыы мунньахха олус үчүгэй санаалар этилиннилэр, сүбэлэр бэрилиннилэр.
Быыстапкаҕа Парасковья Козлова, Октябрина Капитонова, Татьяна Попова, Саяна Петрова, Полина Евсеева, Октябрина Лазарева, Виктория Томская, Андрей Малышев, Ирина Кириллина, Ирина Чепалова кытыннылар.
»Үргэл» Арт-галерея дириэктэригэр Юрий Спиридоновка, кини кэлэктиибигэр, Норуоттар айымньыларын дьиэтин сүрүннүүр исписэлииһигэр Полина Слепцоваҕа махталбытын тириэрдэбит.
Өссө Хатастааҕы оҕо искусствотын оскуолатын уруһуй кылааһын уһуйааччылара С.М.Макарова уонна Е.П.Егорова үөрэтэр оҕолорун кытары киирэн көрбүттэригэр, санааларын атастаспыттарыгар олус үөрдүбүт, махтанныбыт.
Наталья РУФОВА, “Саха сирэ”, edersaas.ru cаайтка анаан