ХИФУ чөл олоҕу көҕүлүүр “Үргэл” түмсүүтүн ыччаттара бу күннэргэ Нам улууһун нэһилиэктэринэн сылдьан, оскуола үөрэнээччилэрин кытта көрүстүлэр, кырдьаҕастарга мастарын саһааннаан, муустарын харайан көмөлөстүлэр, олохтоохторго кэнсиэр көрдөрдүлэр.
Елена ПОТОЦКАЯ, «Саха сирэ» хаһыат, https://edersaas.ru
ФТИ 1-кы курсун магистра, “Үргэл” хаар-десаныгар 5-с сылын сылдьар Алена Калачева хамандыырдаах 15 устудьуон Нам улууһун “Арбын-Көбөкөн (36км)”, “Көбөкөн-Хатырык (26 км)”, “Хатырык-Модут (20 км)”, “Модут-Нам (17 км)”, “Нам-Партизан (20 км)”, “Партизан-Үөдэй (25 км)” маршруттарынан сүүрэн сырыттылар. Сүүрүү “Хаар-айан” десанын институт преподавателэ Виталий Рожин салайан илдьэ сырытта.
Историяттан
1973 сыллаахха СГУ физико- математическай факультетыгар тэриллибит «Үргэл» хаар-десанын тэрийбит оччотооҥҥу ыччаттар билигин эһээ-эбээ буолан олорор үлэ бэтэрээннэрин үөрүөхтэрин иннигэр, 44 сыл устата бу түмсүү симэлийиэхтээҕэр, өссө силистэнэн-мутуктанан иһэр. Ол курдук, бу уопсастыбаннай түмсүүгэ ХИФУ бары институттарыттан олоххо актыыбынай көрүүлээх оҕолор сылдьаллар.
«Тыа сиригэр барарга көҕүлүүр»
Ольга Колодезникова:
— Мин финансовай-экономическай институт 3 кууруһугар үөрэнэбин. Быйыл “Үргэлгэ” бастакы сылбын сылдьабын. Урут маннык тэрилтэ баарын истэр этим уонна хаар десаныгар былырыын бара сатаабытым да, кыаллыбатаҕа. Онон икки сылы быһа ыра санаа оҥостубут баҕам дьэ туолла. Бастаан утаа, чугас улуус буолан, устудьуоннарга болҕомтолорун соччо туһаайыахтара суоҕа диэн сэрэхэдийбитим. Дьолго, олох сыыспыт эбиппин. Олохтоох дьаһалталар баһылыктара хонор сирбитин эрдэ бэлэмнээн, күҥҥэ үстэ аһатан, суунар-тараанар сирбитин булан, көрсүһүүлэрбит чааһын болдьоон, үлэ фронун кэпсэтэн – икки өттүттэн олус өйдөһөн уонна өйөһөн сырыттыбыт. Маннык сырыылар тыа сиригэр үлэлии барар баҕа санааны уһугуннараллар, тапталлаах Сахабыт сирин улуустарын билиһиннэрэр соруктаахтар
Онон маннык тэрээһин — ыччаты тыа сиригэр олохсутууга үлэ биир көрүҥэ.
Елена ПОТОЦКАЯ, «Саха сирэ» хаһыат, https://edersaas.ru