Сыл аайы оскуолаларын сылыта сатыыллар, кыайтара илик.
Женни Стрюкова, “Саха сирэ” хаһыат, //edersaas.ru
Үөһээ Бүлүү улууһун Өргүөт оскуолата ахсынньыттан тохсунньу ый ортотугар диэри тымныйан эрэйдээбитэ ырааппыт. Онон кыстыгы бэлэмнээх уонна сылаастык көрсөр туһуттан хас сайын аайы өрөмүөн ыытарга күһэллэллэр. Муостатын анныгар буор да куппуттар, аныгы базальт матырыйаалы тэлгэппиттэр, тас өттүттэн хайан да көрбүттэр, туһалаабатах. Айаҕалыы сатаан, абыраарай диэн чугуун радиатордары олордубуттар. Туһа суоҕун курдук суох. Хата, оскуола үөрэнээччилэрин улахан тымныыларга кытай халыҥ ыстаана абыраабыт. Аны туран, оскуола барыта тымныы диэҕи, дириэктэр хоһо тымныы буоллаҕына, библиотека хоһо итиинэн батарбат. Онон умайбыт оскуолаларын оннугар тутуллубут саҥа оскуолаларын ититэр ситимэ сыыһа тардыллыбыт буоллаҕа диэн сабаҕалааһын эмиэ баар. Тымныы күннэргэ оҕолор 35 мүнүүтэ үөрэнэргэ күһэллэллэр.
Оскуола сылаас буолара хачыгаар дьуһуурустубатыгар төһө эппиэтинэстээҕиттэн эмиэ тутулуктаах. Онон бу кыһалҕа хонтуруолга турара уолдьаспыт. Өргүөт оскуолата сылааһынан хааччыйыыга төһө да ыарахаттары көрүстэр, үөрэх-иитии үлэтэ манна бэркэ тэриллэр. “Инникигэ хардыыга” мэлдьи ситиһиилээхтик кытталлар. Ол курдук, технологияҕа, географияҕа, английскайга ситиһиилэр үөрдэллэр. Бүтүн Россиятааҕы олимпиадалар муниципальнай түһүмэхтэригэр бастакы, иккис миэстэлээхтэр ахсааннарыгар бааллар.
Спорт да өттүгэр хаалсыбаттар. Хайыһарга, тустууга, волейболга инники күөҥҥэ сылдьаллар. Үчүгэй ситиһиилэр түмүктэрин оҕолор үөрэххэ киирэллэринэн даҕаны көрүөххэ сөп. Оҕолор, сүрүннээн, техническэй хайысхалаах үөрэхтэри талаллар. Ити тыа оскуолатыгар олус үчүгэй ситиһии.
“Түннүктэр арассааданан туолуохтара”
Төһө да оскуолалара тымныытын иһин, былааннара үгүс. Үөһээ Бүлүүгэ ыытыллар “Манчаары оонньууларыгар” бэлэмнэнэн, арассаада бөҕөтүн олордоору сылдьаллар. Хас биирдии кылаас көрөр анал арассаадалардаах буолуоҕа. Ол сибэккилэр аны сайын Үөһээ Бүлүү киэргэлинэн буолуохтара. Оскуола бэйэтэ интэринээттээх. Манна Быракаан оҕолорун сэргэ олохтоох оҕолор эмиэ минньигэс, тотоойу аһылыгынан хааччыллаллар. Бу тыа сиригэр социальнай өттүнэн олус көмөлөөх тэрээһин буолара чахчы. Ордук элбэх оҕолоохторго. Өссө сайын “Вита” диэн оҕуруот аһын үүннэрэр лааҕыры хас да сменанан үлэлэтиилэрэ үлэҕэ үөрэтиигэ да, элбэх оҕолоох ыалларга да көмөлөөх буолбут.
Дьэ, маннык үчүгэй оскуола үлэтин тымныы дьиэ боппуруоһун быһаара сатааһын атахтыыра сүөргү. Оскуола 2005 с. тутуу, онон эргэ дьиэ буолбатах. Аны сайын да сылытыынан дьарыктанаары олороллор. Дьиҥэ, анал үөрэхтээх хомунаалынай хаһаайыстыба үлэһиттэриттэн хамыыһыйа тэрийэн, туохтан сылтаан тымныытын быһаартарыахха наада быһыылаах. Төһө кыалларынан. Оччоҕуна туох эрэ түмүккэ кэлиэххэ сөбө буолуо. Сыл аайы сылытыынан дьарыктаныы ороскуота да ботуччу буолуохтаах.
Төһө да оҕолор ол кытай халыҥ таҥаһын кэтэн олорбуттарын иһин, кэлэр өттүгэр доруобуйаларыгар оҕустарыахтара турдаҕа. Учууталлар эмиэ куруук тоҥо сылдьаллара бэрдэ суох. Онон Өргүөт оскуолата сылыйарын туһугар уталытыллыбат дьаһаллар ылыллаллара уолдьаспыт.
Женни Стрюкова, “Саха сирэ” хаһыат, //edersaas.ru
