От ыйын 17 күнүгэр РФ ЫБМ миниистирин солбуйааччылара Илья Денисов уонна Виктор Ничипорчук үлэ чэрчитинэн өрөспүүбүлүкэҕэ ойуур баһаарын балаһыанньата ханна ордук уустук улуустарыгар сырыттылар.
Билиҥҥи туругунан Горнай оройуонугар 34 ойуур баһаара уопсайа 340 тыһыынча га сир умайа сытар. Дьиикимдэ, Маҕарас, Кэптин, Күөрэлээх нэһилиэктэригэр аэромобильнай бөлөх тэриллэн үлэлиир. Манна 540 киһи, 86 тиэхиньикэ үлэлиир. Ойуур баһаара нэһилиэнньэлээх пууннарга тиийбэтин курдук миэрэлэр ылыллыбыттарын миниистир солбуйааччыта иһитиннэрбит. «Улууска балаһыанньа уустук. Уоту умулларыыга РФ ЫБММ састаабын үлэһиттэрэ үлэлэһэллэр. Итии салгын, тыал дьайан ойуур баһаарын балаһыанньата уустугурар. ЫБММ үлэһиттэрэ үөһэнэн көтөр баһаары умуруорууга уопуттаахтар»,- диэн РФ ЫБМ миниистирин солбуйааччы Илья Денисов бэлиэтээтэ. Виктор Ничипорчук бэлиэтииринэн, суотабай сибээс ситимэ быстыа суохтааҕын, ыксаллаах быһыыга-майгыга олохтоохтор көмө көрдүүр түгэннэригэр сибээс баар буолуохтаах диэтэ.
Ульяна Захарова, edersaas.ru