РФ үтүөлээх бырааһа Иван Егоров хоруона хамсыгын утары быһыы туһунан
16.01.2021
Бэҕэһээ, тохсунньу 15 күнүгэр, коронавирус инфекциятыттан быһыыны мэдиссиинэ наукатын дуоктара, профессор, САССР уонна РФ үтүөлээх бырааһа, РФ санитарнай-эпидемиологическай сулууспатын Бочуоттаах үлэһитэ Иван Егоров бэйэтин баҕатынан ылла.
Иван Яковлевич доруобуйа харыстабылын тиһигэр 50-тан тахса сыл үлэлээбит киһи буоларын быһыытынан, сыстыганнаах ыарыылары утары охсуһуу хайдахтаах суолталааҕын билэр.
«Өрөспүүбүлүкэҕэ коронавирус инфекциятын утары быһыыны оҥоруу саҕаламмытын истээт, мин бэйэм баҕа өттүбүнэн быһыыны ыларга быһаарыммытым. Бары чинчийиини, мэдиссиинэ көрүүтүн ааһан, ыллым. Этэҥҥэбин, настарыанньам үчүгэй. Аны 21 күнүнэн иккиспин ыла барыаҕым. Өрөспүүбүлүкэ бары олохтоохторун доруобуйаҕыт бэйэҕит илиигитигэр буоларын өйдүүргүтүгэр ыҥырабын«, — диэбит Иван Яковлевич.
СӨ Доруобуйа харыстабылын министиэристибэтин уопсастыбаннай сэбиэтин бэрэссэдээтэлэ Иван Егоров, 30 сыл ыстаастаах эпидемиолог быраас быһыытынан, Арассыыйа вакцината бары нуорумалар уонна ирдэбиллэр тутуһуллан оҥоһуллубуттарыгар уонна састааба хаачыстыбалааҕар эрэнэрин биллэрэр.
Кини маны сэргэ, пандемия саҕаланыаҕыттан Саха сиригэр салалта, Бырабыыталыстыба, өрөспүүбүлүкэтээҕи суһал ыстаап сатабыллаах үлэлэринэн, коронавирус инфекциятын бохсууга тиһиктээх үлэ ыытыллыбытын этэр.
«Өскөтүн коронавирус дьаҥа саҥа тарҕаныытыгар анаалыстар бигэргэтиллиигэ Новосибирскайга ыытыллар эбит буоллахтарына, билигин вирусологическай лабораториялар өрөспүүбүлүкэ бары улахан мэдииссинэтин тэрилтэлэригэр, оройуоннар киин балыыһаларыгар, СПИД-кииҥҥэ бааллар. Өрөспүүбүлүкэҕэ куораттар, улуустар балыыһаларыгар куойкалары тэрийии, инфекционнай стационардары, обсерватордары арыйыы үлэлэрэ тоҕоостоох кэмигэр ыытыллыбыттара. Биһиги медиктэрбит үчүгэй бэлэмнэниини ааспыттара, килиниичэскэй балыыһа быраастара Москваҕа улахан килииникэлэргэ стажировкаламмыттара, — диир Иван Егоров.
Кини Саха сиригэр кутталлаах инфекционнай ыарыыны утары охсуһуу үрдүк таһымнаахтык тэриллибитин бэлиэтиир: «Мин 54 сыл бырааһынан үлэлиибин, 26 сыл өрөспүүбүлүкэ кылаабынай санитарнай бырааһынан, түөрт сыл доруобуйа харыстабылын миниистиринэн үлэлээбитим. Онон Саха сиригэр Сибиир язватын уо.д.а. кутталлаах ыарыылары утары охсуһуулар уопуттарын тэҥнээн көрөн, коронавирус инфекциятын утары охсуһуу үрдүк таһымҥа ыытыллар диэн эрэллээхтик этэбин«, — диир кини.
СӨ Ил Дархан уонна Бырабыыталыстыба пресс-сулууспата
+1
+1
+1
+1
+1
+1
+1