РФ Судаарыстыбаннай сүбэтигэр Ил Дархан Өлүөнэ муостатын тутуута тыын суолталааҕын бэлиэтээтэ

Бүгүн, балаҕан ыйын 4 күнүгэр, Владивосток куоракка буола турар Илиҥҥи экэнэмиичэскэй форум чэрчитинэн Ил Дархан Айсен Николаев дойду бэрэсидьиэнэ Владимир Путин бэрэссэдээтэллээх РФ Судаарыстыбаннай Сүбэтин президиумун мунньаҕар кытынна. Манна кини Өлүөнэ өрүс нөҥүө муоста тутуллара Уһук Илин сайдыытын национальнай бырагырааматыгар улахан суолталааҕын бэлиэтээтэ. 

edersaas.ru, «Саха сирэ» хаһыат

— Өлүөнэ  муостата тутулуннаҕына Уһук Илин эрэгийиэннэрин Арктиканы кытта ситимниэ. Муоста үс федеральнай, биэс эрэгийиэннээҕи суолу, АЯМ тимир суол ситимин, өрүс пуордун уонна аан дойдутааҕы таһымнаах аэропуорду холбуур кыахтаныа. Айылҕа баайдаах сиргэ төгүрүк сыл үлэлиир суол аһыллыа, Саха сирин нэһилиэнньэтэ тырааныспарынан хааччыллыытын 20%- 83% диэри үрдэтиэ. Хоту табаары тиэйиигэ бүддьүөт ороскуота сыл ахсын 4 миллиарды куоһарар сууманан кыччаан биэриэ, — диэн эттэ Айсен Николаев.

Ил Дархан итини таһынан, Уһук Илин сайдыытыгар Владивосток куоракка төгүрүччү эргийэр массыына суолун тутуута, аэропуортары, муора пуортарын саҥардыы, салгыы федеральнай айан суолун тутуу киириэн сөбүн туһунан санаатын үллэһиннэ.  Ол туһунан СИА иһитиннэрэр.

edersaas.ru