РФ Үөрэх миниистирин солбуйааччы Татьяна Васильева гимназияны, лиссиэйи уонна кэллиэһи көрдө

Дьокуускай куорат классическай гимназиятыгар, Саха политехническэй лиссиэйгэ, 2 №-дээх национальнай  политехническэй оскуолаҕа сырытта. Маны сэргэ Дьокуускайдааҕы мэдиссиинэ кэллиэһин көрдө. Бу туһунан СӨ Үөрэх уонна наука министиэристибэтин пресс-сулууспата иһитиннэрэр.

Ол курдук, мэдиссиинэ кэллиэһигэр сылдьан, кини үөрэх тиһигин тэрийиигэ кэлэктиип өрө көтөҕүллэн үлэлиирин, идэни баһылыырга, маастарыстыбаны үрдэтэргэ туһааннаах күрэстэргэ үксүгэр кытталлара, бу инникитин үүнэн-сайдан тахсалларыгар улахан олугу уурарын бэлиэтээбит.

Маны сэргэ, БКЭ ыытыллар сирдэрин, Дьокуускайга эксээмэни тэрийиигэ бэлэмнэнии хайдаҕын билсэн, көрөн-истэн баран, Роспотребнадзор ирдэбиллэрэ тутуһуллаллара көстөрүн эппит.

Дьокуускай куорат үөрэххэ управлениетын начаалынньыга Алексей Семенов Дьокуускай куорат үрдүнэн 1066 оҕо эксээмэн туттарарын эппит. Онуоха санитарнай ирдэбили тутуһууга улахан болҕомто уурулларын, эксээмэн иннинэ аудиториялар, тэрийээччилэр, тиэхиньикэлэр төһө бэлэмнэрэ бэрэбиэркэлэнэрин бэлиэтээбит.

СӨ Үөрэх уонна наука министиэристибэтин пресс-сулууспата иһитиннэрэринэн, РФ үөрэх миниистирин солбуйааччы Хаҥалас, Нам улуустарыгар уонна Дьокуускай куоракка үөрэх тэрилтэлэригэр сылдьыбыт.