РФ үөрэҕин миниистирин солбуйааччы Татьяна Васильева Нам улууһугар сырытта
Бүгүн, от ыйын 14 күнүгэр, РФ үөрэҕин миниистирин солбуйааччы Татьяна Васильева уонна судаарыстыбаннай бэлиитикэ департаменын референа Марина Репина Нам улууһугар сырыттылар.
edersaas.ru
Делегация бастатан туран 1-кы нүөмэрдээх оскуолаҕа тэриллибит биир кэлим эксээмэни туттарар анал пууҥҥа тиийдилэр. Роспотребнадзор ирдэбилэ төһө тутуһулларын кэтээн көрдүлэр.
Ол курдук туһааннаах улууска биир кэлим эксээмэни туттарыы 4 пууна үлэлиир. Бу сылга үөрэнээччилэр география, информатика, литература, нуучча тылын, физика, история, профильнай математика эксээмэннэрин номнуо туттардылар. Сотору кэминэн обществознаниены, химияны, биологияны, англия тылын туттарыахтара. Нам улууһун баһылыга Юрий Слепцов киин регионнартан педагогтары ыҥыран, үөрэҕирии хаачыстыбатын тупсарыыга туһанарга этии киллэрдэ.
Салгыы оробуочай бөлөх «Солнышко» оҕо саадыгар сырытта. Бу оҕо саада «Демография» национальнай бырайыагынан 2019 сыллаахха тутуллубута. Уһуйаан түөрт бөлөхтөөх. 98 миэстэлээх.
Татьяна Викторовна оонньуур хостору, куукунаны, спортивнай уонна музыкальнай саалалары көрдө. Көрсүһүү түмүгүнэн, миниистири солбуйааччы улуус үөрэх сайдыытыгар улахан болҕомтотун уурарын бэлиэтээтэ.
Нам улууһун дьаһалтатын пресс-сулууспата