РФ президенин быыбарыгар кандидаттары регистрациялааһын түмүктэннэ. Бүлүтүөҥҥэ аҕыс кандидат аата киириэҕэ. edersaas.ru
Быыбар киин хамыыһыйата кандидаттар туттарбыт илии баттааһыннарын олунньу 6 күнүгэр диэри бэрэбиэркэлээн, бүлүтүөҥҥэ кимнээх чопчу киирэллэрин иһитиннэрдэ.
Санатан эттэххэ, илии баттааһынын хомуйуутуттан босхоломмут ЛДПР лидерэ Владимир Жириновскайтан, КПРФ кандидата Павел Грудининтан уратылар регионнартан илии баттааһынын хомуйан, тохсунньу 31 күнүгэр диэри туттарыахтаахтара. Быыбар киин хамыыһыйатын быһаарыытынан, 16 кандидат илии баттааһынын хомуйуутугар ылсыбыт буоллаҕына, бу түһүмэҕи ааһан биэтэккэ 6 киһи таҕыста.
Быыбар киин хамыыһыйатын бэрэссэдээтэлэ Элла Памфилова иһитиннэрбитинэн, 839586 илии баттааһынтан 360 тыһыынчата (хас биирдии кандидаттан 60 тыһ. куолас) бэрэбиэркэлэммит, докумуоннары сыныйан үөрэтиигэ исписэлиистэр өттүлэриттэн туох да алҕас тахсыбатах, бэриллибит куоластар бары тэҥ усулуобуйаҕа көрүллүбүттэр. Бэлиэтээн эттэххэ, бэрэбиэркэлээһини суруналыыстар, кандидаттар бэрэстэбиитэллэрэ кэтээн көрбүттэрэ.
Бэйэ кандидатуратын туруоруммуттартан икки киһи Владимир Путин уонна Владимир Михайлов илии баттааһынын хомуйуутугар ылсыбыттара. Санатан эттэххэ, бэйэ кандидатуратын туруоруммут дьон 300 тыһыынчаттан итэҕэһэ суох куолаһы хомуйуохтаахтара. Хомойуох иһин, Владимир Михайлов бу кэрдииһи кыайан ааспата. Оттон Владимир Путин 85 регионтан барыта 1,5 мөлүйүөн илии баттааһынын хомуйбутуттан, Быыбар киин хамыыһыйатыгар 314,8 тыһ. куолаһы туттарбыта. Итинтэн 232 (0,39 %) илии баттааһына дьиҥэ суоҕунан ааҕыллыбыта. Быраабыла быһыытынан, бу көрдөрүү 5 % куоһардаҕына, кандидат кыайан регистрацияламмат. Онон Владимир Путин бэйэ кандидатуратын туруоруммут 46 кандидаттан иккис түһүмэҕи соҕотоҕун ааста.
Партиялаахтартан илии баттааһыныгар 14 кандидат кыттыбыт буоллаҕына, Быыбар киин хамыыһыйатыгар 5 киһи докумуонун туттарбыта. Ол курдук, “Яблоко” партияттан киирсэр Григорий Явлинскай 105 тыһ. илии баттааһынын хомуйан биэрбитэ. Мантан 643 (1,07 %) куолас – дьиҥэ суох. “Партия роста” бэрэстэбиитэлэ Борис Титов 105 тыһ. илии баттааһынын туттарбытыттан 2611 (4,35 %) дьиҥэ суоҕунан ааҕыллыбыта. “Российский общенародный союз” кандидата Сергей Бабурин эмиэ 105 тыһыынча куолаһы киллэрбититтэн 1908 (3,18 %) куолаһа – дьиҥэ суох. “Гражданскай инициативаттан” кыттар Ксения Собчак 104,9 тыһ. куолаһы биэрбититтэн 798 (1,33 %) – дьиҥэ суох. “Коммунисты России” партияттан киирсэр Максим Сурайкин 104,9 тыһ. илии баттааһынын туттарбытыттан 2234 (3,72 %) – дьиҥэ суох.
Онон бу үөһээ ааттаммыт аҕыс кандидат быыбарга илин-кэлин түсүһүөхтэрэ. Бүлүтүөҥҥэ кинилэр ааттара алфавитынан туруоҕа: Сергей Бабурин, Павел Грудинин, Владимир Жириновскай, Владимир Путин, Ксения Собчак, Максим Сурайкин, Борис Титов уонна Григория Явлинскай.
Аграфена КУЗЬМИНА, “Саха сирэ” хаһыат, edersaas.ru