Бэҕэһээҥиттэн РФ Бырабыыталыстыбатын вице-премьерэ — РФ Бэрэсидьиэнин Уһук Илин федеральнай уокурук боломуочуйалаах бэрэстэбиилэ Юрий Трутнев салайааччылаах дэлэгээссийэ Дьокуускай куоракка үлэлиир.
Ол чэрчитинэн, бүгүн РФ Уһук Илини уонна Арктиканы сайыннарыыга миниистэрэ Алексей Чекунков ХИФУ сылдьан, Future Skills:NEFU диэн аан дойду таһымнаах киин үлэтин кытта билистэ. Федеральнай миниистири ХИФУ проректора Николай Николаев көрүстэ уонна университет устуоруйатыттан саҕалаан билиҥҥи үлэтин, бырайыактарын туһунан кылгастык билиһиннэрдэ. Салгыы Future Skills:NEFU диэн аан дойду таһымнаах киин үлэтэ сырдатылынна. Манна инженерияҕа аналлаах бырайыактары оҥороллор. Ону салгыы үлэлэтэргэ араас хайысхалаах бырайыактары толкуйдууллар. Федеральнай миниистир 4-с куурус устудьуона Иван Сергеевтыын кэпсэттэ. Эдэр уол толлубакка, бырайыактары чуолкайдык быһааран биэрдэ.
Александр Тарасов, «Саха сирэ» хаһыат