РФ бырабыыталыстыбата Саха сиригэр социальнай тутууларга үбү көрүөҕэ
Горнай улууһун Бэс Күөлүн сэлиэнньэтигэр элбэх хайысхалаах саҥа киини тутарга уонна Дьокуускай куоракка “Үлэ кыбартаала” креативнай кластеры тутууну түмүктүүргэ үбү 2022-2023 сылларга федеральнай бүддьүөттэн биэриэхтэрэ.
Бу туһунан дьаһалга РФ бырабыыталыстыбатын бэрэссэдээтэлэ Михаил Мишустин илии баттаата. Уһук Илиҥҥэ олорор дьиэлэри, тырааныспар уонна социальнай инфраструктуратын сайыннарарга уопсайа 1,6 миллиард солкуобай көрүллүөҕэ.
Бу үптэн 550 мөлүйүөн солкуобайы Саха Өрөспүүбүлүкэтэ ылыаҕа. Бэс Күөлүгэр Киини тутарга 395 мөлүйүөн солкуобай көрүлүннэ. Федеральнай бүддьүөт үбүнэн ону таһынан Дьокуускайга креативнай кластер тутуллан үлэҕэ киллэриллиэҕэ. 2022 сылга кластеры тутарга Арассыыйа бырабыыталыстыбата федеральнай бүддьүөттэн 200 мөлүйүөн солкуобайы ыытыаҕа.
Балаҕан ыйа бүтүөр диэри РФ Уһук Илин уонна Арктика сайдыытыгар министиэристибэтин кытары эбии сөбүлэһии ылыллара былааннанар. Ону таһынан 2022 сылга Үөһээ Бүлүү улууһун Харбалаах нэһилиэгэр И.Н.Барахов аатынан Култуура киинин олоххо киллэрэргэ 138 мөлүйүөн солкуобай кээмэйдээх эбии үбүлээһин өйөннө. Эбийиэк 2023 сылга үлэҕэ киллэриллэрэ былааннанар.
Бырайыак быһыытынан, Бэс Күөлүгэр Атамайдааҕы сынньалаҥ киинигэр Култуура дьиэтэ, бибилэтиэкэ, успуорт саалата уонна тэрилтэлэр холбоһуохтара.
Дьокуускайга креативнай кластер IT-исписэлиистэргэ, архитектордарга, дизайнердарга, муусукааннарга уонна да атын айар идэлээхтэргэ биисинэс-инкубатор курдук үлэлиэҕэ.
Надежда ЕГОРОВА, “Саха сирэ”, edersaas.ru