Доруобуйа

РФ Бырабыыталыстыбата коронавируһу утары охсуһар дьаһалларга 2 млрд солк. көрдө

Коронавирус дьаҥа турбута балтараа сылтан орто даҕаны чугуруйар санаата адьас суох. Өссө сэтэриэх курдук. РФ  Бырабыыталыстыбатын  бэрэссэдээтэлэ Михаил Мишустин  коронавирус дьаҥын утары охсуһарга  дойду резервнэй пуондатыттан 2 млрд солк. көрөргө аналлаах дьаһалга илии баттаата.

Бу үптэн 223 мөл. солк. Москваҕа, Санкт-Петербурга, Новосибирскайга, Екатеринбурга, Нижнэй Новгородка, Казаньҥа, Челябинскайга, Омскайга уонна Самараҕа ПЦР-кииннэрин тэрийиигэ туһаныллыаҕа.  Инфекционнай диагностикалаах, мониториннаах уонна патогеннары быһаарарга аналлаах түөрт лабораториялаах комплекс тутуллуоҕа. Итини тэҥэ, коронавирус дьаҥын чинчийиигэ, эпидемиологическэй-санитарнай үлэни күүһүрдэргэ,  хонтуруоллуурга тыырыллыаҕа.

Михаил Мишустин балаҕан ыйын 3 күнүгэр  ыытыллыбыт РФ Бырабыыталыстыбатын мунньаҕар бэлиэтээбитинэн,  сөптөөх үп көрүллэрэ дойду үрдүнэн  кутталлаах инфекциялар тарҕаныыларын бохсор аналлаахтар. Кутталлаах инфекциялары тарҕатыыны утары охсуһууга эбии дьаһаллары ыларга  Арассыыйа Бэрэсидьиэнэ Владимир Путин  РФ Федеральнай Мунньаҕар сорудахтаабыта.

edersaas.ru

 

 

0
0