РФ бэрэсидьиэнин Уһук Илиҥҥэ боломуочунай бэрэстэбиитэлэ Юрий Трутнев, РФ Уһук Илин уонна Арктика сайдыытын миниистирэ Алексей Чекунков уонна Ил Дархан Айсен Николаев “Үлэ кыбаартала” Уһук Илин уокуругунааҕы технологическай пааркаҕа сырыыларын кэмигэр килиэккэни оҥоруу технологиятынан искуственнай быары оҥоруу лабораториятыгар сырыттылар.
Саха учуонайдара ыытар үлэлэрэ биһирэнэн, номнуо алтынньыга «Unicorn capital partners» инвестиция ааҕыныстыбатын ыҥырыытын ылбыттара да, бу бырайыак көдьүүстээҕин туоһулуур. Бүгүҥҥү күҥҥэ ECLiS биотехнологическай лаборатория «Якутия» технопаарка иһинэн үлэлиир биотехнология эйгэтинэн дьарыктанар 15 резидеҥҥэ научнай баазанан буолар. Бу хампаанньалар эми оҥоруунан, бырамыысаланнас салаатыгар туттуллар биологическай эттиктэри оҥорон таһаарыынан, килиэккэ технологиятын чинчийиинэн дьарыктаналлар.
Учуонайдар бу бырайыагынан 2016 сылтан дьарыктаналлар. Эдэр аспирант Леонид Жожиков былырыын ХИФУ медицинскэй институтун бүтэрэн, терапевт быраас үөрэҕин баһылаабыт. Билигин аспирантураҕа генетика салаатыгар үөрэнэр. Кини ХИФУ медицинскэй институтун иһинэн үлэлиир килиэккэ технологиятын уонна регенеративнай мэдьиссиинэ ECLiS лабораториятыгар үлэлиир учуонайдар бөлөхтөрүн кытта үлэлиир.
Леонид Жожиков бэлиэтииринэн, быар тыыннаах килиэккэлэрэ бүөр гемодиалиһын курдук хааны наадалаах эттиктэринэн хааччыйыахтара.
— Биһиги уопут быһыытынан кыылларга бу сонун сүүрээн дьайыытын бэрэбиэркэлээн көрдүбүт. Онно хаан үчүгэйдик ыраастанара көһүннэ, — диэн санаатын үллэһиннэ кэскиллээх эдэр учуонай.
Елена ПОТОЦКАЯ, “Саха сирэ” хаһыат, edersaas.ru
Хаартыскаҕа ааптар түһэриитэ.