Степан Бурнашев, “Хара дьай”, “Маҥнайгы таптал”, Республика Z” уонна да атын киинэлэр режиссердара:
— Таһырдьа бачча үчүгэйгэ тахсыахха баҕа баар бөҕө буоллаҕа. Ол эрэн, киһи наар баҕарбытынан сылдьар кыаҕа суох, сороҕор дьону көмүскүүр сыалтан бэйэтин хааччахтаныах тустаах. Билигин ордук кырдьаҕастарга кутталлаах дьаҥ кэлбитигэр, бастатан туран, аҕа саастаах дьоммутун харыстыахтаахпыт. Саха норуота тулуурдааҕынан аатырар, кытаатыҥ, дьиэҕитигэр олоруҥ!
Билигин бэйэм Аммаҕа тахсан олоробун. Таах сыппакка дьиэ тас үлэтин оҥоробун, маспын аа-дьуо хайытан бүтэн эрэбин. Ону тэҥэ сценарий суруйабын. Киэһээтин киинэ көрөбүн.
Бириэмэ көстүбүтүн туһанан киинэлэрдэ, сериалларда көрүҥ диэн сүбэлиэм этэ, куоттарбыт, хаһаана сылдьыбыт киинэлэргит бааллара буолуо. Ким айыан-тутуон баҕарар хоһоон, кэпсээн суруйарга холонуоххутун сөп. Билигин саамай тоҕоостоох кэм үүннэ быһыылаах. Саҕалаабатаххытына табылларын-табыллыбатын хантан билиэххитий? Эбэтэр, сценарий суруйан көрүҥ.
Егор Карпов, edersaas.ru