Режиссер Люба Борисова: Уулуссаҕа мээнэ тахсыыттан туттуна сатааҥ
Люба Борисова, “Мин үрдүбэр күн хаһан да киирбэт” киинэ режиссера:
— Билигин КОВИД-19 ыарыы күүскэ тарҕанна. Онон саастаах чугас дьоҥҥутун харыстааҥ, уулуссаҕа мээнэ тахсыыттан туттуна сатааҥ. Булгуччу дьиэҕэ олордоххо эрэ сатанар. Тулуйан аймахтаргытыгар, табаарыстаргытыгар сылдьыбат буола сатааҥ.
Сорох үлэни дьиэҕэ да олорон үлэлиэххэ сөп. Олох кыаллыбат, оҕолор мэһэйдиир буоллахтарына, дьиэҥ аттыгар соҕотоҕун үлэлииргэ анаан, офис куортамныахха сөп эбит. Тус бэйэм ыксаан оннук гыммытым, билигин саҥа сценарий суруйа сылдьабын. Чугас буолан сатыы сылдьабын, аҕыйах мүнүүтэ салгын сии таарыйа хаамабын уонна кими да кытта көрсүбэккэ тиийэбин. Уулуссаҕа тахсарга күһэлиннэххитинэ хайаан даҕаны маасканы илдьэ тахсыҥ. Маҕаһыыҥҥа киирэргэ булгуччу мааска кэтиэххэ наада.
Дьиэҕэ олорон саҥа дьарыкта булуна сатааҥ. Мин бу күннэргэ Шишонин диэн ааттаах быраас гимнастикатын оҥорон эрэбин. Олус туһалаах эбит, араас эминэн үлүһүйбэккэ, хамсаныы көмөтүнэн бэйэҥ иммунитеккын холбуур. Ютубка булан көрүҥ, сүбэлиирэ барыта оруннаах, туһалыыр.
Егор Карпов, edersaas.ru