Саха сиригэр ойуурга эрэгийиэн көрүҥнээх ыксаллаах быһыы-майгы эрэсиимэ биллэрилиннэ
Бүгүн, от ыйын 2 күнүгэр, Саха сирин бырабыыталыстыбатын бэрэссэдээтэлин солбуйааччы Алексей Колодезников видео-кэмпириэнсийэ сибээһинэн өрөспүүбүлүкэ сиригэр-уотугар ойуур баһаарын сэрэтиигэ уонна туоратыыга анаммыт хамыыһыйа мунньаҕын ыытта.
Бастакы вице-премьер иһитиннэрбитинэн, бүгүн Саха сирин баһылыга Айсен Николаев ойуурга уот турар кутталлааҕынан уонна нэһилиэнньэлээх пууннарга кутталы үөскэтэринэн эрэгийиэн көрүҥнээх ыксаллаах-быһыы майгы эрэсиимин киллэрэр туһунан ыйаахха илии батаата. Алексей Колодезников ордук хоту оройуоннарга элбэх сиргэ уот турбутун бэлиэтээтэ. Баһаартан сылтаан ойуурга муниципальнай көрүҥнээх ыксаллаах быһыыны-майгыны Абыйга, Аллараа Халымаҕа, Эбээн Бытантайга уонна Орто Халыма оройуоннарыгар биллэрдилэр.
Өрөспүүбүлүкэҕэ ойуурга турбут баһаардарынан сибээстээн, СӨ экологияҕа, айылҕаны туһаныыга уонна ойуур хаһаайыстыбатыгар миниистирэ Сахамин Афанасьев иһитиннэрии оҥордо. Кини этэринэн, өрөспүүбүлүкэ харыстанар сирдэригэр-уоттарыгар уопсайа 1519 гектар иэннээх 30 ойуур баһаара 15 муниципальнай оройуоҥҥа умайыыта бэлиэтэнэр. Итилэртэн Кэбээйи, Өлүөхүмэ, Орто Халыма, Эбээн Бытантай оройуоннарыгар 201 гектар иэннээх сиргэ баһаар хаптатылынна. Ааспыт сууккаҕа 4 ойуур баһаарын Ньурба, Хаҥалас, Сунтаар, Уус Маайа оройуонарыгар умуллардылар.
Күөх ойуурга турбут уоту умулларыыга Авиалесоохрана, Якутлесресурс, ЫБМ сулууспалара үлэлииллэр. Уопсайа 800 киһи кыттар, 79 тиэхиньикэ үлэлиир, 115 салгын суудуната туһаныллар.
Сахамин Афанасьев бу нэдиэлэҕэ көмөҕө эбии федеральнай күүстэр уопсайа 90 киһи Амур уонна Чита уобаластарытан кэлиэхтэрэ диэтэ. Маны сэргэ сарсын Ханты-Мансийскай автономнай уокуруктан уонна Тюмень уобалаһыттан “Авиалесоохрана” тэрилтэттэн парашютнай-десантнай сулууспа исписэлиистэрэ көтөн кэлиэхтэрэ.
Маны сэргэ Орто Халыма, Аллараа Халыма, Таатта, Уус Майа, Горнай уонна Чурапчы оройуоннарын салайааччылара иһитиннэрии оҥордулар.
Мунньаҕы түмүктүүрүгэр Алексей Колодезников үлэни күүһүрдэргэ сорудахтаата. Тус эппиэттээх бидэмистибэлэргэ сорудахтары биэрдэ. Ол курдук, сарсын Дьааҥыга көмөлөһүүгэ сөмөлүөт көтүүтүн тэрийэргэ, ону тэҥэ Орто Халыма оройуонугар үлэҕэ туһаныллар тиэхиньикэ саппаас чааһын ыытарга эттэ.
Саха Өрөспүүбүлүкэтин Ил Дарханын уонна
Саха Өрөспүүбүлүкэтин бырабыыталыстыбатын пресс-сулууспата,
бэлэмнээтэ Женни СТРЮКОВА.