Сэтинньи 9 күнүттэн 29 күнүгэр диэри Меркурий планета «төттөрү эргийэр» кэмэ саҕаланар. Астрологтар этэллэринэн, бу кэмҥэ олох тэтимэ бытаарар. Ыксаабакка, урукку дьыалалары сааһылыырга, ханна туһаайан иһэри өйдүүргэ табыгастаах кэм үүнэр.
Сэтинньи 9 күнүттэн саҕалаан бу ый 29-с чыыһылатыгар диэри Меркурий планета халлааҥҥа төттөрү хамсыыр курдук көстөр кэмэ – ретрограднай кэм саҕаланар. Астрологтар этэллэринэн, бу кэмҥэ Сиргэ олох эмиэ ааспыкка эргиллэр, бытаарар курдук буолар.
Астролог Борис Зак быһаарарынан, сэтинньи 18 күнүгэр диэри Меркурий Охчут бэлиэтигэр сылдьыа, онтон 19-с чыыһылаттан Скорпион бэлиэтигэр төннүө. Бу хамсааһын ураты эйгэни үөскэтэр: бастаан тылга-өскө өйдөспөт буолуу, дьон кэпсэтиитигэр этиһии тахсыан сөп, оттон ый бүтүүтэ киһи бэйэтин иһигэр саҥаны арыйыы, иэйии уһуктуута күүтүллэр.
Табыллыбат түгэн дуу, тохтоон толкуйдуур кэм дуу?
Үгүс киһи ретрограднай Меркурий кэмин табыллыбат түгэннэр кэккэлэһиилэрин курдук ылынар: тиэхиньикэ алдьанар, рейстэр көтөппөт буолаллар, көрсүһүүлэр тохтотуллаллар, суолталаах суруктар буостаттан сүтэн хаалаллар. Ол эрээри, астрология үөрэҕинэн, ити накаастабыл буолбатах, бу кэмҥэ тохтоон, олоҕу ырыҥалаан көрөргө бэриллэр бэлиэ.
Астролог Борис Зак этэринэн, ити кэмҥэ олох бары бырасыаһа бытаарар. Аан дойду биһигини урукку дьыалаларбытын көрөргө, саҥа быһаарыныыны ылынарга ыксаабаппытыгар күһэйэр.
Бу кэм тугунан үчүгэйий?
Ретрограднай Меркурий кэмигэр киһи ис туруга, үксүн биллибэккэ хаалар санаалара күөрэйэн тахсаллар. Урут болҕомтобутун уурбатахпытын көрөбүт, ааспыт кэм ааҥҥа сэрэнэн тоҥсуйарын курдук билэбит. Умнуллубут доҕоттор эмискэ суруйуохтарын, уостубут иэйиилэр бэйэлэринэн санатыахтарын сөп.
Борис Зак сүбэлииринэн, бу кэми кытта охсуһар сатаммат, күүһүн-уоҕун бэйэ туһатыгар туһаныахха наада. Ретрограднай Меркурий – анаалыстыырга, түмүктүүргэ, төннөргө табыгастаах кэм. Урут саҕаламмыты билигин ситэриэххэ сөп. Ол курдук, бу кэм үчүгэй:
- Урукку бырайыактарга, санааларга, былааннарга төннөргө;
- Буостаны, докумуоннары бэрээдэктииргэ;
- Бэйэни анаарарга, иэйиигин өйдүүргэ;
- Сыһыаннары саҥалыы көрөргө, суолталарын өйдүүргэ;
- Быраҕыллыбыт үөрэҕи, куурустары, дьарыгы салҕыырга.
Маны таһынан, дьиэни-уоту, малы-салы эрэ буолбакка, өйү-санааны бэрээдэктииргэ сөптөөх кэм.
Туохтан сэрэниэххэ нааданый?
Борис Зак сэрэтэринэн, бу кэмҥэ алҕас тахсар, күүтүллүбэт содул үөскүүр куттала улахан. Сэтинньигэ ордук манныктары оҥорортон туттунуохха наада:
- Тиэхиньикэни, гаджеты, массыынаны атыылаһартан – алдьаммыт түбэһиэн сөп;
- Дьылҕаны быһаарар улахан быһаарыныылары ылынартан — кэргэн тахсарга этии, үлэттэн уурайыы, көһүү, улахан атыы-эргиэн;
- Саҥа бырайыактары саҕалыыртан — ордук сибээскэ, маркетиҥҥа, докумуоҥҥа сыһыаннаах буоллаҕына;
- Улахан суумалаах харчыны инвестициялыыртан, уһун болдьохтоох хантараактары түһэрсэртэн.