Дьокуускай куоракка А.Е.Кулаковскай аатынан норуоттар доҕордоһууларын дьиэтигэр «Винтаж» ретро-быыстапка бэртээхэйэ арылынна. Кэлиҥ, сылдьыҥ, ыалдьыттааҥ. Ааспыты ахтыһыҥ, уруккуну санатыһыҥ, эдэр сааскытын эргитэн ылыҥ диэн пресс-сулууспаттан иһитиннэрэллэр.
Бэртээхэй быыстапканы дьоҥҥо-сэргэҕэ көрдөрөргө анаан, А.Е.Кулаковскай аатынан норуоттар доҕордоһууларын дьиэтин национальнай сыһыаннаһыыларга эйгэ үөрэтэр-методологическай киинэ тэрийбит.
Көрдөрүүгэ ууруллубут киэргэл арааһын, урукку косметиканы, парфюмерияны, холбукалары, сувенирдары, о.д.а. малы-салы көрөөччүлэр олус сэргиэхтэрэ, сэҥээриэхтэрэ.
Манна хары чаһыларын, хаппаҕын арыйа баттаатахха дыргыл сытын билигин да сүтэрбэккэ илдьэ сылдьар духуулар, одьукулуоннар иһиттэрин, косметикалары, кырасыабай киэргэллэри, сумочкалары кэллиэксийэлээччилэр өрөспүүбүлүкэтээҕи бөлөхтөрүн салайар Семенова Эльвира Николаевна-Сэргэ Кыыһа Тускулаана, түөскэ иилиллэр дьэрэкээн үрүмэччи боруостары Ючюгяева Дария Дмитриевна, 1960-с сыллардааҕы иһиттэри, хопполору, шкатулкалары Кузнецова Светлана Семеновна, сахалыы нарынтан-нарын оҥоһуулаах үрүҥ көмүс ытарҕалары Захарова Анастасия Дмитриевна, сүрэҕи манньытар дьэрэкээн оҕуруолары, киэргэллэри Новгородова (Шишигина) Тамара Егоровна, киһи сөҕө-махтайа, хайгыы көрөр былыргы киэргэллэрин Ашихманова Наталья Юрьевна, Элизбарашвили Полина Васильевна, Птицына Надежда Петровна, Парникова Татьяна Васильевна, Шишигина Любовь Егоровна аҕалбыттар.
Пресс-сулууспа иһитиннэрбитинэн, киирии босхо. Быыстапка кулун тутар 10 күнүттэн үлэлии турар. Муус устар ыйга кэлэн көрүөххүтүн эмиэ сөп.
Николай Гоголев хаартыскаларга түһэриитэ.