Дьокуускай куораттааҕы национальнай гимназия 25 сыллаах үбүлүөйүн бэлиэтээтэ. Үөрэх кыһатыгар научнай-практическай конференция, гимназия олоҕун, үлэтин кэрдиис кэмнэринэн виртуальнай айан, көлүөнэлэр көрсүһүүлэрэ, онтон да атын бэрт интэриэһинэй тэрээһиннэр ыытыллыбыттар. Бу туһунан Дьокуускай куораттааҕы национальнай гимназия сырдатар.
Долгутуулаах тэрээһин түһүлгэтигэр мустубут ыалдьыттары, учууталлары оҕолор ууммут бэлэхтэрэ улаханнык үөрдүбүт. Ол курдук, эҕэрдэ эйэҕэһигэр, истиҥэр кыттыһан, кыһа бэһис «А» кылааһын кэлэктиибэ (кылаас сал. С.А.Адамова) киһини эрэ кэрэхсэтэр, сонурҕатар икки ураты кинигэни бэлэх ууммут. Кинигэлэргэ иккиэннэригэр оҕолор үөрэнэр кыһаларын туһунан санааларын, истиҥ эҕэрдэлэрин, тэрээһиннэргэ түспүт хаартыскаларын түмпүттэрэ киллэриллибиттэр. Соһутара уонна сэҥээрдэрэ: биирэ улахан, иккиһэ быыкаа, испиискэ хоруопкатын эрэ саҕа кээмэйдээх эбит.
Манна даҕатан эттэххэ, “бичиктэр” да, гимназия кэлэктиибэ да бэлиэтииринэн, оҕолор төрөппүттэрин кытта гимназия үбүлүөйүнэн үтүө дьыала тэрээһинин ыыппыттар. Кылаас чааһыгар «Бичик» кинигэ кыһатыгар тахсыбыт араас дьэрэкээн ойуулаах, баай ис хоһоонноох кинигэлэр, остуол оонньууларын тустарынан билиһиннэрбиттэр уонна бибилэтиэкэ пуондатыгар бэлэх ууммуттар.