Үөрэнээччилэр Украинаҕа анал эпэрээссийэҕэ кытта сылдьар саллааттарбытыгар көмө оҥордулар
Дойдубут үрдүнэн Украинаҕа буола турар байыаннай эпэрээссийэҕэ аналлаах араас хабааннаах аахсыйалар ыытыллаллар. Ол курдук, Кэбээйи улууһун Сангаар бөһүөлэгэр 1 №-дээх оскуола 2 «б» кылааһын үөрэнээччилэрэ байыаннай эпэрээссийэҕэ кытта сылдьар дойдубут хорсун-хоодуот саллааттарыгар көмөлөһөргө санаммыттар.
Үөрэнээччилэр төрөппүттэрин, кылаас салайааччытын кытта бородуукта арааһын хомуйан, тута Дьокуускайдааҕы гуманитарнай көмөнү хомуйар анал пууҥҥа ыыттылар.
Альбина Каратаева, кылаас салайааччыта :
— Дойдубут хорсун-хоодуот саллааттарыгар көмөлөһөр туһунан аахсыйаны истэн, кылааһым оҕолоругар уонна төрөппүттэригэр кыттарга этии киллэрбитим. Ону төрөппүттэр тута ылыммыттара уонна бары эппиэтинэстээхтик сыһыаннаһан, икки хоппо бородууктаны хомуйдубут, — диэн санаатын үллэһиннэ.