А.Е.Кулаковскай аатынан норуоттар доҕордоһуларын дьиэтин иһинэн үлэлиир Ресурснай үөрэтэр-методологическай киин Дьокуускай куорат 38 №-дээх оскуолатыгар норуоттар сомоҕолоһууларын тиэмэтигэр аналлаах уруок тэрийдэ. Уруок сүрүн сыала — оҕолор төрөөбүт дойдуларын таптыылларыгар, харыстыылларыгар, бэриниилээх буолууларыгар, Арассыыйа устуоруйатын сэргээн үөрэтэллэригэр, билиилэрин-көрүүлэрин хаҥаталларыгар туһаайылынна. Үөрэнээччилэргэ «Арассыыйа күүһэ—норуот сомоҕолоһуутугар» тиэмэҕэ өйтөн суруйууга сорудах бэрилиннэ. Бу туһунан А.Е.Кулаковскай аатынан норуоттар доҕордоһууларын дьиэтин пресс-киинэ иһитиннэрдэ.
«Арассыыйа күүһэ — норуот сомоҕолоһуутугар»
Сомоҕолоһуу диэн өйдөбүл, мин санаабар, норуот күүһэ, бары норуоттар, омугуттан тутулуга суох бары биир киһи курдук өйдөбүллээх, иллээх, эйэлээх буолуох тустаахпыт. Россия үрдүнэн элбэх араас омук олорор. Хас биирдии норуот бэйэтэ туһунан төрөөбүт тыллаах, итэҕэллээх, култууралаах. Норуоппут устуоруйатын куруутун ханна да тиийдэрбит ытыктыы уонна өрө тута сылдьарга үөрэниэхтээхпит. Хас биирдии оҕоҕо, дьиэ-кэргэниттэн саҕалаан оннук өйдөбүл баар буолуохтаах. Бэйэтин норуотун култууратын билэр оҕо кыра эрдэҕиттэн норуотун ытыктыы, кининэн киэн тутта улаатар.
Биһиги аан ийэ дойдубутугар элбэх араас норуоттар олороллор. Омугуттан тутулуга суох бары биир ыал курдук иллээх-эйэлээх буолуох тустаахпыт. Оччоҕо эрэ биһиги үүнэ-сайда туруохпут. Бары биир сыаллаах-соруктаах олорорбутун умнуо суох тустаахпыт. Биһиги аан дойдубут куруутун иллээх-эйэлээх, ыраас халлааннаах буолуохтун!!!
Алена Чикалева,
8 “Б” кылаас үөрэнээччитэ.
Норуоттар сомоҕолоһууларын күнүгэр биһиги өрүү бары норуоттар доҕордуу, биир сомоҕо буолалларын туһунан саныыбыт. Биһиги дойдубутугар, сирбитигэр-уоппутугар элбэх бырааттыы норуоттар олороллор. Кинилэр култуураларын, тылларын-өстөрүн харыстыырга, сайыннарарга үлэлэһэллэр.
Саха сирэ — биһиги бүттүүммүт баайбыт-дуолбут, киэн туттуубут. Олохпут кэскилэ, сайдыыта биһиги, бары норуоттар истиҥ-эйэҕэс сыһыаннаахпытыттан, иллээх-эйэлээх, түмсүүлээх олохтоохпутуттан тутулуктааҕын өйдүүбүт. Олохпут сайдыыта ону сэргэ, дьон-сэргэ өбүгэлэрин үгэһин сэргииллэриттэн, хардарыта сэҥээрсэллэриттэн, үөрэнэллэриттэн, билэргэ-көрөргө дьулуһалларыттан эмиэ тутулуктаах. Норуоттар доҕордоһуулара, түмсүүлэрэ — дойдубут, өрөспүүбүлүкэбит бигэ тирэхтэниитэ.
Күннэй Куличкина,
5 “Д” кылаас үөрэнээччитэ, 26 № -дээх оскуола.
Хаартыскалар: А.Е.Кулаковскай аатынан норуоттар сомоҕолоһууларын дьиэтин пресс-сулууспатыттан