Үөрэнээччилэр Кэлэр көлүөнэ пааркатын ис бараанын оҥорууга көрүүлэрин эттилэр
Үүнэр көлүөнэ пуондата Кэлэр көлүөнэ пааркатын ис бараанын оҥорууга оҕолору, ыччаты кытта үлэтин салгыыр. Ол курдук, ыам ыйын 14 күнүгэр эрдигэс оҕолорго “Skills Park” сатабылын сайыннарыыга үөрэх бырагыраамата буолан ааста. Аҕыс нэдиэлэ устата оҕолору кытта “deti МВА” тинейджердарга аналлаах норуоттар икки ардыларынааҕы биисинэс-оскуола уонна Supreme School сатабылы сайыннарар оскуола үрдүк квалификациялаах преподавателлэрэ үлэлэстилэр.
“Биһиги оҕолор лидер буолар, уратытык толкуйдуур, ырытан көрөр, эмоциональнай интеллект, быһаарынар, тайм-менеджмент курдук сатабылларын сайыннардыбыт. Бу күннээҕи олоххо уонна профессиональнай эйгэҕэ ситиһиилээх буоларга сирдиир сатабыллар”, — диэн “Supreme School” сатабылы сайыннарар оскуола салайааччыта Айталина Федорова кэпсээтэ.
Түмүктүүр түһүмэххэ хамаандалар 2025 сылга үлэҕэ киллэрэргэ былаанныыр паарка бырайыагын ис бараанын хайдах көрөллөрүн үллэһиннилэр. Санатан эттэххэ, паарка Үүнэр көлүөнэ пуондатын “Во имя будущего” бырагыраама иитинэн тутаах бырайыагынан буолар.
“Үөрэнээччилэр букатын араас бырайыактары эппиттэриттэн уонна киэҥ хабааннаах боппуруостары таарыйбыттарыттан дьиктиргээтим. Маныаха паарка кэнсиэпсийэтин олоххо киллэриигэ биһиги толкуйбутун кытта дьүөрэлэһэллэрэ суолталаах. Холобур, оҕолор үөрэх хаамыытын көҕүлүүр уонна интэриэһинэй буоларын туһугар геймификацияны, бэйэ валютатын уонна атын ньымалары киллэрэргэ этэллэр. Аныгы эрдигэс оҕо ирдэбилигэр сыһыаннаах уйулҕа атын даҕаны тиэмэлэр бааллар. Улахан интэриэстээхтэриттэн уонна номнуо билиҥҥиттэн паарка тула көхтөөх ыччат түмсэн эрэрэ үөрдэр”, — диэн Үүнэр көлүөнэ пуондатын салайааччыта Владимир Егоров бэлиэтиир.
Ону тэҥэ, оҕолор паарканы зоналарга, тропическай үүнэйилээх оранжереяларга, сэһэргэһэр уонна киинэ көрөр хосторго, коворкинг кииҥҥэ о.д.а. араартыырга интэриэһинэй бырайыактары эттилэр. Түмүккэ « INNI city» хамаанда кыайыылааҕынан таҕыста.
“Биһиги хамаандабыт аата сахалыы “Инники” диэн тылтан тахсар. Биһиэхэ куорат систиэмэтэ баар буолуо – туспа уулуссалар, болуоссаттар, түһүлгэлэр, ону таһынан коинынан төлүүр систиэмэ. Биир дойдулаахтарбыт релакс зонаҕа коинынан төлүөхтэрин сөп: оонньуур уонна батут хосторго, шар бассейннарга, оҕолорго уонна ыччаттарга аналлаах кафеҕа. Биһиги биисинэс, медиа, олох уонна успуорт акаедмиятыгар куурустары тэрийэр былааннаахпыт. Хас биирдии бэлиэтэммит киһи пааспар ылар уонна дьарык ахсаанынан рангата эбиллэн иһэр”, — диэн «INNI CITY» хамаанда хапытаана Виктория Аммосова кэпсиир.
“Тропическай үүнээйилэр оранжереялара – киһи ханнык баҕарар усулуобуйаҕа бэйэтин сайыннарар, миэстэтин булар кыахтааҕын туоһулуур. Маны оҕолор уонна ыччат билэрэ суолталаах, туохтан даҕаны тутулуга суох кинилэр бэйэлэрин баҕа санааларын толоруохтарын сөп. Бу кэм устата бары доҕордостубут, паарка тутуллан бүтэрин тутулуйбакка-тэһийбэккэ күүтэбит”, — диэн “4 стихия” хамаанда чилиэнэ Маргарита Ербасская эбэн этэр.
СӨ Үүнэр көлүөнэ тус сыаллаах пуондатын пресс-сулууспата.