Соторутааҕыта түөрт сулуһун бигэргэппит гостиничнай комплекс «RENABO» эрэстэрээнэ «Саха сирин амтана» гастрономия бэстибээлин эксперт-ыалдьыттарын Чочур Мураан мыраан күөлүн үрдүгэр тутулла турар муус оҥоһуктары көрдөрүүттэн саҕалаата.
edersaas.ru
Бу сонун сүүрээн ыалдьыттары олус сөбүлэттэ. Онон «RENABO» эрэстэрээн ыалдьыттары көрсүү сиэригэр-туомугар биир бэртээхэй көрүҥү эбэн киллэрдэ.
Сотору кэминэн урбаанньыт Герман Арбугаев айан ыттара сыарҕаҕа бөрө тириитэ сонноох булчуту тиэйэн аҕаллылар.
«Саха сирин амтана» гастрономия бэстибээлин экспертэрэ ол киһини тутан ылан, хаартыскаҕа түһэ оҕустулар. Онон эрэстэрээннэр икки ардыларыгар сылаас оптуобуһунан сылдьар ыалдьыттарбытын «Кыһын Саха сириттэн саҕаланар» кыһыҥҥы туризм бэстибээлэ сибиэһэй салгынынан тыыннаран, тымныыны эттэринэн-хаанарынан биллэрэн ылла.
Мин ол үөрүүлээх мүнүүтэни суотабайбар кыл түгэнигэр үйэтитэн ыллым! Дьонум үөрдүлэр аҕай.
Ол кэннэ ыалдьыттарбыт дьиэҕэ киирээттэрин кытта эрэстэрээн хаһаайыттара нууччалыы сиэри тутуһан, килиэптээх тууһунан көрүстүлэр. Экспердэр аһыыр саалаҕа киирэн иһэн, мууһунан оҥоһуллубут иһиккэ ууруллубут тоҥ балыгы амсайдылар. Ол кэмҥэ киин телевидение суруналыыһа бу муус иһиттээх кыһыллыбыт тоҥ балыгы хаартыскаҕа түһэрэ олорорун эмиэ «кылап» гынан түһэрэн ыллым.
Ыалдьыттар миэстэлэрин булан олороотторун кытта Олоҥхо тыйаатырын эдэр артыыһа Василена Шарина хомуска оонньоон, «RENABO» эрэстэрээн этническэй көрүҥэр эбии «очкону» сонно суруттаран кэбистэ.
Дьэ, онтон экспердэр үлэлэрин саҕалаатылар — 20-тэн тахса араас аһы амсайыы буолла.
Эрэстэрээн шеф-пуобара Татьяна Александрова бэйэтэ астаабыт аһын билиһиннэрдэ. Киһи кэрэхсиэҕэ, нуучча киһитэ диэтэххэ, саха национальнай бүлүүдэлэрин эндэппэккэ билэрэ сөхтөрдө. Билэрин ааһан, бу астыыра минньигэһин! Астыыра эрэ буолуо дуо, астаммыт бүлүүдэтин оҥорон көрдөрбүтэ сиэдэрэйин, сатабылын көрүөххүт этэ. Ол курдук, оҕуруот аһын кытта убаһа хаттатын иһит оннугар хаппыт блины форматыгар кутан аҕалан көрдөрдө. Туустаах кыһыл балыгы оливканы кытта лимоҥҥа укпута бэрт сонуннук көһүннэ. Таба этин сымыыттаах канапе гынан оҥорбут. Сотору кэминэн балыктан үтүллүбүт шашлыгы амсатта. Аны «мартышка» диэн таптаан ааттыыр тоҥ күөрчэхпит облепиха, кыһыл хаптаҕас, сугун отоннордоох үс көрүҥүн амсайдыбыт.
Японияттан сылдьар бэрт элбэх сололоох ыалдьыт, «Кайсеки рёри» эрэстэрээн шеф-пуобара, мышленовскай сулус хаһаайына, 19-с үйэ саҕаттан шеф-пуобардар 11 көлүөнэлэрин чаҕылхай бэрэстэбиитэлэ Сибуити Косаки сылдьыбыт эрэстэрээннэригэр эт астан араас бүлүүдэлэри оҥороллорун бэлиэтээтэ. Кини ордук таба этин сөбүлээбитин биллэрдэ.
«Саха сирин амтана» гастрономия бэстибээлэ аан дойдуга тахсыан сөп олус үрдүк таһымнаах эбит,— диэн санаатын үллэһиннэ Сибуити Косаки.
«RENABO» эрэстэрээн «Саха сирин амтана» гастрономия бэстибээлигэр кыттан, бииргэ куонкурустаспыт 11 тэрилтэ ортотугар бэйэтин аатын дорҕоонноохтук ааттатта.
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа: Дьокуускай куорат уокуругун суруналыыстарын, Юлия Ходулова уонна ааптар бэйэтин түһэриилэрэ.