Бу күннэргэ Үөрэҕи уонна науканы кэтээн көрөр федеральнай сулууспа биир кэлим эксээмэн (ЕГЭ) баалыгар хайдах гынан баалы эбинэр туһунан 6 ньыманы ыйда. Ханныктарый?
Сороҕор, кырдьык, кыһыылаахтык икки-үс баал тиийбэккэ оҕо бүддьүөт миэстэтигэр эбэтэр букатын даҕаны үөрэххэ киирбэккэ хаалар түгэннэрэ бааллар. Хайдах гынан биир кэлим эксээмэн (ЕГЭ) баалыгар баал эбиэххэ сөбүй?
Бастакытынан, түмүктүүр өйтөн суруйуу (итоговое сочинение). Хас биирдии үрдүк үөрэх кыһата үлэни араастык сыаналыыр. Онон төһө кыалларынан үчүгэйдик суруйар ирдэнэр. Өйтөн суруйуу иһин баал ааҕылларын туһугар абитуриент докумуон туттарарыгар ыйыахтаах. Үрдүк үөрэх тэрилтэтэ баазаттан бэйэтэ көрөр.
Иккиһинэн, туйгун сыаналаах аттестат. Кыһыл аттестат эрэ буолбакка, орто анал үөрэҕи (СПО) кыһыл дипломунан бүтэрбиттэргэ эмиэ баал эбиллэр.
Үсүһүнэн, олимпиада. Бүтүн Арассыыйатааҕы үөрэнээччилэр олимпиадаларын түмүктүүр түһүмэҕэр миэстэлэспиттэр биридимиэттэринэн сөп түбэһэр үөрэхтэригэр эксээмэнэ суох киириэхтэрин сөп. Уопсайынан, хас биирдии үрдүк үөрэх тэрилтэтэ ханнык олимпиада иһин, хас баалы эбэрин эрдэттэн саайтыгар суруйар.
Төрдүһүнэн, спорка ситиһии иһин. Олимпиадаҕа, Паралимпиадаҕа, Сурдлимпиадаҕа миэстэлэспиттэр, аан дойду, Европа чөмпүйэнээтин кыайыылаахтара, холобур, физкультурнай үөрэххэ туттарсар буоллахтарына тургутуута суох киириэхтэрин сөп. Онтон атын хайысхалаахха туттарсар буоллахтарына, баал эбиллиэн сөп. Манна ГТО бэлиэтэ эмиэ учуоттанар. Сиһилии туттарсар үөрэххит саайтыгар көрүөххүтүн сөп.
Бэсиһинэн, волонтерунан үлэ. Волонтердарга эмиэ баал эбиллэр. Хас баал эбиллэрин туттарсар үөрэххит саайтыгар көрүөххүтүн сөп.
Алтыһынан, айар уонна интеллектуальнай куонкурустар. Хас биирдии үрдүк үөрэх тэрилтэтэ учуоттуур куонкурустардаах. Барыларыгар биир халыып буолбат. Онон эмиэ саайтка көрөр ирдэнэр.
Санатан эттэххэ, Арассыыйа бары үрдүк үөрэҕин тэрилтэлэрэ 2021-2022 үөрэх дьылыгар туттарсыы быраабылатын алтынньы бүтүүтэ номнуо саайтарыгар таһааран тураллар. Ханнык тэрээһин иһин хас баал учуоттанара, ханнык докумуон ирдэнэрэ, ханна бэлиэтэниини ааһар барыта суруллар.
«Саха сирэ» хаһыат, edersaas.ru
Хаартыска: propostuplenie.ru