Ил Дархан социальнай ситимнэринэн ыыппыт быһа сибээһин кэмигэр үөрэххэ сыһыаннаах балачча ыйытыы киирдэ. Хас биирдиитигэр сиһилии хоруйдаата.
Ыйытыы: Алын кылаастар үөрэхтэрин эрдэ түмүктүөхтэрэ дуо?
Хоруй: Үөрэх дистанционнай ньыманан бара турар. Бу ньыма биир кэм наарыгар (ритм) киирдибит. Ыраах нэһилиэнньэлээх пууннар оскуолаларыгар оннооҕор миэстэтигэр тиийэн үөрэнэллэр. Алын кылаастарга үөрэх дьыла эрдэ түмүктэнэрин туһунан туох даҕаны быһаарыы суох.
Ыйытыы: Бүтүн Арассыыйатааҕы бэрэбиэркэлиир үлэ (ВПР) буолар дуо?
Хоруй: Бүтүн Арассыыйатааҕы бэрэбиэркэлиир үлэни РФ Үөрэҕириигэ министиэристибэтэ кэлэр үөрэх дьылын саҥатыгар көһөрдө.
Ыйытыы: Биир кэлим эксээмэн (ЕГЭ), сүрүн судаарыстыбаннай эксээмэн (ОГЭ) буолар дуо?
Хоруй: Биир кэлим эксээмэн (ЕГЭ) уонна сүрүн судаарыстыбаннай эксээмэн (ОГЭ) буолар. Болдьоҕо эрэ көһөн биэрэр. Чопчу хаһан ыытыллаллара, бүгүҥҥүтэ бигэргэнэ илик. ЕГЭ маҥнайгы эксээмэнин бэс ыйын 8 күнүгэр ыытар санаалаахтара эрээри, балаһыанньа оннун була илик, онон өссө көһөрөн биэриэхтэрин сөп. ЕГЭ-ни букатын суох гынар дуу, кэлэр үөрэх дьылыгар көһөрөр дуу туһунан кэпсэтии барбат, быһаарыы суох.
Ыйытыы: Үөрэх олоҕурбут ньымата (традиционная школа) олохтон хаалла дуо?
Хоруй: Үөрэх олоҕурбут көрүҥэ өссө да үгүс сыллар тухары туһаныллыаҕа, олохтон хаалбат. Ону кытта, оҕолорбут үөрэхтэригэр көмөлөһөр, билиини иҥэрэр, хаачыстыбалаах үөрэҕи биэрэр ньыма баар буоллаҕына, биһиги ол ньыманы эмиэ туһаныахтаахпыт.
Ыйытыы: Оскуолаларга сынньалаҥ (каникул) туһунан туох биллэрий?
Хоруй: Сынньалаҥ буолуоҕа. Өссө биирдэ чиҥэтэн этэбин, биһиги биир кэлим эксээмэн (ЕГЭ), сүрүн судаарыстыбаннай эксээмэн (ОГЭ) бүтэһиктээх болдьоҕо хаһан быһаарылларын күүтэбит.
Ыйытыы: Чааһынай уһуйааннары кимнээх өйүөхтэрэй?
Хоруй: Биһиги өйүөхпүт. Чааһынай уһуйааннарга субсидия эрдэттэн (аванс) көрүллэригэр быһаарыы ыллым. Бу күннэргэ тахсыаҕа. Урукку сылларга төһө оҕо хабыллыбытыттан көрөн (по факту) хойутаан төлөнөрө. Чааһынай уһуйааннары өйүөхтээхпит.
Ыйытыы: Медицинэ үлэһиттэрин оҕолоругар уһуйаан хайдах быһаарылынна?
Хоруй: Хас биирдии улууска дьуһуурунай бөлөхтөр тэриллибиттэрэ.
Людмила ПОПОВА, edersaas.ru
Мария ВАСИЛЬЕВА (СИА) хаартыскаҕа түһэриитэ.