Бу күннэргэ РФ Үөрэҕириигэ министиэристибэтэ төрөппүттэр, учууталлар ордук туоһулаһар, чопчулаһар ыйытыыларыгар хоруйдары биэрдэ.
Ыйытыы: 1-8 кылаастар үөрэхтэрэ ыам ыйын 15 күнүгэр түмүктэнэр. Быйылгы үөрэх бырагырааматын барытын барбатахтар хайыылларый? Үөрэхтэрэ балаҕан ыйын 1 күнүн иннинэ, атырдьах ыйыгар саҕаланар дуо?
Хоруй: Эрэгийиэннэргэ оскуолаларга үөрэҕи маннык күннэргэ түмүктүүргэ сүбэ ыыппыппыт:
1-8 кылаас үөрэнээччилэригэр ыам ыйын 15 күнүгэр үөрэҕи (үөрэх нэдиэлэтиттэн көрөн), ыам ыйын 15-25 күннэригэр уруогу таһынан үлэни уонна эбии үөрэхтээһин бырагырааматын түмүктүүргэ эппиппит. 10-с кылаастар ыам ыйын 29-30 күннэригэр диэри бүтүөхтээхтэр. Онтон 9-с уонна 11-с кылаастары ыам ыйын 5 күнүгэр диэри бүтэриҥ диэн сүбэлээбиппит.
Үөрэҕи уонна үөрэх ньыматын түмүктээһин бүтэһиктээх быһаарыытын хас биирдии эрэгийиэн бэйэтэ быһаарар. Кэлэр үөрэх дьыла үгэс быһыытынан аны күһүҥҥүттэн саҕаланара былааннанар.
Ыйытыы: РФ Үөрэҕириигэ министиэристибэтэ эксээмэҥҥэ бэлэмнэниигэ тэлэбиисэринэн уруоктары ыыттарар. Харантыын кэнниттэн ЕГЭ-ҕэ, ОГЭ-ҕэ бэлэмнэниигэ бу ньыма туһаныллыа дуо?
Хоруй: Бары толкуйдар, ситиһиилээх механизмнар ирдэнэр буоллаҕына салгыы даҕаны туһаныллыахтара. Ол эрээри, дистанционнай ньыма үөрэх хаамыытыгар эбилик эрэ буолар, олоҕурбут үөрэҕи хайдах даҕаны солбуйбат. Дистанционнай технологиялар, ТВ-ньыма эмиэ, инникитин уһуннук эмтэнэр эбэтэр уһун кэм устата үөрэх тэрилтэлэригэр тиийэн кыайан үөрэммэт оҕолорго көмөлөөх буолуоҕа.
Ыйытыы: 11-с кылаастар түмүктүүр өйтөн суруйуу эрэсиэрбэҕэ күнүн ыам ыйын 6 күнүттэн ыам ыйын 25 күнүгэр көһөрбүттэрэ. Өскөтүн эпидемиологическай балаһыанньа тупсубат түгэнигэр өйтөн суруйууну уларыталлар дуо?
Хоруй: Өскөтүн эпидемиологическай түгэнинэн уонна эрэгийиэннэргэ ылыллыбыт хааччахтыыр миэрэлэринэн сибээстээн, кыайан ыытыллыбат түгэнигэр, Рособрнадзор кинилэргэ эксээмэҥҥэ диэри атын күнү аныаҕа.
Ыйытыы: Интэриниэккэ уруогу уонна дьиэҕэ үлэни сороҕор көмпүүтэри туһанан толорор ирдэнэр. Атыылаһар кыахпыт суох буоллаҕына хантан ылабытый?
Хоруй: РФ Үөрэҕириигэ министиэристибэтэ көмпүүтэргэ наадыйар дьиэ кэргэҥҥэ уонна педагогтарга эрэгийиэннэргэ көмөнү оҥорууну тэрийэр үлэни ыытар. Маннык көмөнөн номнуо 250 тыһыынча үөрэнээччи уонна педагог туһанна. Көмө бырагыраама туһунан үөрэх управлениетын уорганыттан билсиэххитин сөп. Ону тэҥэ, РФ Үөрэххэ министиэристибэтин, Стратегическай көҕүлээһин агентствотын (АСИ) уонна “Биир ньыгыл Арассыыйа” баартыйаны кытта кыттыгас аахсыйаларын саайтыгар помогиучитьсядома.рф. суруйуоххун сөп.