Мантан инньэ, үрдүк үөрэх кыһалара тус сыаллаах үөрэх усулуобуйатын кэстэхтэринэ бүддьүөт ороскуотун толуйалларыгар эбээһинэстиир итиэннэ дистанционнай үөрэх туһунан сокуон ылылынна.
“РФ Үөрэх туһунан” сокуоҥҥа уларытыы киирдэ. Бастакытынан, тус сыаллаах үөрэхтээһин (целевое обучение) туһунан. Санатан эттэххэ, урукку сылларга, холобура, тус сыаллаах үөрэххэ оҕону ыытан баран үлэҕэ ылбатах тэрилтэ, устудьуон үөрэнэригэр бүддьүөттэн көрүллүбүт үбү төнүннэрэрэ. Билигин ити быраабыла үрдүк үөрэх тэрилтэлэригэр эмиэ дьайар буолла. Өскөтүн, устудьуону тус миэстэҕэ бэйэтэ сакаастаан үөрэттэрэн баран үлэҕэ ылбатаҕына, бүддьүөттэн төлөммүт ороскуоту уйунар. Онон, мантан инньэ тус сыаллаах миэстэ аҕыйыыр чинчилээх диэн сабаҕалыахха сөп.
Иккиһинэн, дойду үрдүнэн эбэтэр дойду хайа эрэ чааһыгар ыксаллаах быһыы-майгы эбэтэр уһулуччу бэлэмнээх буолуу эрэсиимэ биллэрилиннэҕинэ, өскөтүн балаһыанньа тупсуор диэри үөрэҕи уһатар кыаллыбат буоллаҕына, оскуолалар, үрдүк үөрэх кыһалара дистанционнайынан үөрэтиэхтээхтэр диэн ыйыллар.
Чопчулаан этэр буоллахха, холобура, билиҥҥи курдук коронавирус эҥин өрө турар кэмигэр, үөрэҕи уһатар кыаллыбат буоллаҕына оскуола оҕолоро, устудьуоннар ыраахтан олорон (дистанционно) үөрэнэллэрэ сокуонунан бигэргэннэ. Урукку сылларга Арассыыйаҕа хаһан даҕаны маннык балаһыанньа үөскээбэтэх итиэннэ ыраахтан олорон үөрэтэр даҕаны кыаллабыт буолан, Үөрэх туһунан сокуоҥҥа бу суоҕа.
Людмила ПОПОВА, “Саха сирэ” хаһыат, edersaas.ru
Хаартыска: Омск Здесь.