Быйыл хамсык дьаҥынан сибээстээн, биир кэлим эксээмэннэр, докумуону тутуу төһө даҕаны уһаан биэрдэр, хойутаабыт, баалларынан хапсыбакка хаалбыт абитуриеннар эбэтэр үрдэтиниэн баҕалаах дьон элбэхтэр. Билигин хаалбыт төлөбүрдээх уонна кэтэхтэн үөрэххэ ылаллар.
Хотугулуу-Илиҥҥи федеральнай университет
Өрөспүүбүлүкэ сүрүн үөрэҕин кыһатыгар ХИФУ-га быйыл даҕаны куонкурус уруккутун курдук. Бүддьүөттэн балачча элбэх миэстэ көрүлүннэ. Сүрүн уратыта диэн, ханнык баҕарар үрдүк үөрэх кыһатын курдук, докумуону ыраахтан олорон туттулар.
Докумуону тутуу: ХИФУ-га кэтэхтэн (заочно) туттарсааччылартан эбии тургутуулаах (вступительные испытания) үөрэхтэргэ алтынньы 9 күнүгэр, биир кэлим эксээмэн (ЕГЭ) түмүгүнэн туттарсааччылартан алтынньы 16 күнүгэр диэри докумуону туталлар.
Миэстэтэ: 2020-2021 үөрэх дьылыгар филиалларын ааҕан туран бүддьүөттэн 4 060 миэстэ тыырыллыбыт. Оттон төлөбүрдээххэ орто уонна үрдүк үөрэҕи барытын ааҕан туран 2 103 миэстэни суоттаналлар.
Сыаната: Кэтэхтэн үөрэх төлөбүрэ сылга 69 тыһыынча солкуобайтан саҕаланар. Аҥаардаан төлүүр көҥүллэнэр.
Элбэх сайабылыанньа: Кэтэхтэн туттарсааччылар ХИФУ-га ордук педагогическай уонна инженернэй үөрэхтэри, ону тэҥэ, финансовай-экэнэмиичэскэй институт хайысхаларын сэҥээрэллэр эбит.
Арктикатааҕы судаарыстыбаннай агротехнологическай университет
СГТХА (ЯГСХА) быйыл саас саҥа таһымҥа тахсан, Арктикатааҕы судаарыстыбаннай агротехнологическай университет (АГАТУ) аатын сүкпүтэ. Ону кытта саҥа хайысхалар аһыллыбыттара. Ол курдук, инженернэй факультекка “теплоэнергетика уонна теплотехника”, “электроэнергетика уонна электротехника”, ойуур комплекса уонна землеустройство факультетыгар “лесное дело (магистратура)”, “землеустройство уонна кадастр (магистратура)” саҥа идэлэр аһыллыбыттара.
Докумуону тутуу: АГАТУ-га үөрэххэ туттарсыахтарын баҕарар дьонтон докумуоннарын балаҕан ыйын 30 күнүгэр диэри күнүскү (очно) төлөбүрдээх миэстэҕэ уонна алтынньы 30 күнүгэр диэри кэтэхтэн (заочно) ылаллар.
Миэстэтэ: 2020-2021 үөрэх дьылыгар, уопсайа, 1 500 миэстэни былаанныыллар. Бүддьүөттэн, уопсайа, 860 миэстэ көрүллүбүт, 640 төлөбүрдээх миэстэни суоттаналлар.
Сыаната: АГАТУ-га төлөбүрдээх кэтэхтэн (заочно) үрдүк үөрэх 42 тыһыынча солкуобайтан саҕаланар. Аҥаардаан төлүүр көҥүллэнэр.
Элбэх сайабылыанньа: Быйыл ааспыт сыллааҕар элбэх сайабылыанньа киирбитин ыйаллар. Сүрүннээн инженернэй факультет саҥа хайысхаларыгар уонна “агроинженерия”, “информационнай систиэмэ уонна технология”, экэнэмиичэскэй факультет бары үс хайысхатыгар итиэннэ управление уонна технология кэллиэһигэр элбэх киһи туттарыста диэн бэлиэтииллэр.
Чурапчытааҕы физическэй култуура уонна успуорт судаарыстыбаннай института
Чурапчытааҕы физическэй култуура уонна успуорт судаарыстыбаннай института Арассыыйаҕа тыа сиригэр үлэлиир соҕотох үрдүк үөрэх кыһатынан буолар. Институт тэриллиэҕиттэн үгүс биллэр-көстөр үлэһити үөрэтэн таһаарда.
Докумуону тутуу: Ахсынньы 1 күнүгэр диэри төлөбүрдээх орто анал үөрэххэ, алтынньы 30 күнүгэр диэри кэтэхтэн (заочно) төлөбүрдээх үрдүк үөрэххэ докумуоннары туталлар.
Сыаната: Кэтэхтэн үөрэххэ сыллааҕы төлөбүрэ 61 тыһыынча солкуобайтан саҕаланар. Аҥаардаан төлүүр көҥүллэнэр.
Элбэх сайабылыанньа: кэтэхтэн туттарсааччылар сүрүннээн психолого-педагогическай хайысха “оскуола иннинээҕи үөрэхтээһин” идэтин сэҥээрэллэр эбит.
Орто анал үөрэх кыһалара
Саха сирин орто анал үөрэхтэрин кыһаларын материальнай-тиэхиньиичэскэй баазалара сыллата хаҥаан иһэр, ону кытта орто үөрэҕи сэҥээрэр оҕо ахсаана үксүүр. 2020-2021 үөрэх дьылыгар, уопсайа, 7 саҥа идэ аһыллыбыт, манна 162 миэстэ көрүллүбүт.
Докумуону тутуу: миэстэ баар түгэнигэр сэтинньи 25 күнүгэр диэри докумуону туталлар. Күн бүгүн сорох кэллиэскэ, тиэхиньикумҥа аҕыйах миэстэ баар. Сиһилии 50-60-44 төлөпүөнүнэн билсиэххитин сөп.
Миэстэтэ: быйыл 6 422 бүддьүөт миэстэтэ, кэтэхтэн 80 миэстэ көрүллүбүт. Төлөбүрдээх үөрэххэ барыллаан 2 000 миэстэни былаанныыллар.
Сыаната: Сыллааҕы төлөбүрэ ортотунан 60 тыһыынча солкуобайга тэҥнэһэр. Аҥаардаан төлүүр көҥүллэнэр.
Элбэх сайабылыанньа: өрүү буоларыныы, быйыл эмиэ мэдиссиинэ, педагогика, үп-харчы, экэниэмикэ салааларыгар, көмпүүтэри кытта сибээстээх идэлэргэ куонкурус үрдүк.
Людмила ПОПОВА, “Саха сирэ” хаһыат, edersaas.ru