Саха сирин үгүс оҕото олохтоох үрдүк үөрэх кыһаларыгар туттарсаллар. Кыл мүччү бааллара хапсыбатахтар төлөбүрдээххэ киирэргэ күһэллэллэр, төрөппүттэр сыаната олус үрдүк диэн салла саныыллар.
edersaas.ru
Холобур, ыраата барбакка М.К.Аммосов аатынан Хотугулуу-Илиҥҥи федеральнай университеты ылан көрүөҕүҥ. Ааспыт нэдиэлэҕэ “Саха сирэ” хаһыат ХИФУ-ну кытта кыттыгас ыытар төлөпүөнүнэн “быһа сибээһин” кэмигэр төлөбүрдээх үөрэх туһунан ыйытыы киирбитигэр, проректор Михаил Федоров араас барыйааннары үөрэтэн көрүөххэ сөбүн кэпсээбитэ. Бастатан туран, өрөспүүбүлүкэ тус сыаллаах (целевой) миэстэлэрин көрөрүн эппитэ. Ол оннугар, устудьуон үөрэҕин бүтэрдэҕинэ, ханна дуогабардаспыт улууһугар тиийэн үс сыл үлэлиэхтээх. Иккиһинэн, Арассыыйаттан көрүллэр бүддьүөт миэстэтигэр эмиэ тус сыаллаах (целевой) миэстэ баар буоларын ыйбыта. Балары улуус дьаһалтатыттан, улуустааҕы үөрэх управлениеларыттан ыйыталаһыҥ диэн сүбэлээбитэ.
Аны проректор иһитиннэрбитинэн, хас даҕаны суол чэпчэтии көрүллэр эбит. Ол курдук, холобура, Хотугулуу-Илиҥҥи федеральнай университекка үөрэх сылга 300 тыһыынча солкуобайга тиийиэн сөп эбит. “Өрөспүүбүлүкэ үрдүнэн “Хотугулуу-Илиҥҥи университет үөрэҕин уокуруга” (“Северо-Восточный университетский образовательный округ”) ассоциацияҕа 106 үөрэх тэрилтэтэ (кэллиэстэр, оскуолалар) киирэр. Холобур, манна киирбит үөрэх тэрилтэлэрин бүтэрбит дьоҥҥо, үрдүк бааллаахтарга, ХИФУ бэйэтин эксээмэнин ситиһиилээхтик туттарбыттарга, 1 уонна 2 группалаах инбэлииттэргэ, тулаайах уонна төрөппүт көрүүтэ суох хаалбыт оҕолорго, ХИФУ Үрдүк үөрэх иннинээҕи үөрэҕин уонна профориентацияҕа бакылтыатын бэлэмнэнии салаатыгар үөрэммиттэргэ, БКЭ (ЕГЭ) бэлэмнэнии толору кууруһун ааспыттарга, о.д.а. чэпчэтии көрүллэр. Төлөбүр саамай кычаабыта 125 тыһыынча солкуобайга диэри түһүөн сөп”, — диэн хоруйдаабыта. Ону тэҥэ, биир кэлим эксээмэннэрин (ЕГЭ) 160 баалтан намыһаҕа суох туттарбыттарга чэпчэтии көрүллэр эбит. Төлөбүрдээх үөрэххэ чэпчэтии кимнээххэ, ханнык түгэҥҥэ көрүллэрин сиһилии университет киин тутар хамыыһыйатын https://priem.s-vfu.ru/news/platnoe-obuchenie-v-svfu.html сайтыттан билсиэххитин сөп.
Людмила ПОПОВА, “Саха сирэ” хаһыат, edersaas.ru
Хаартыска: интэриниэттэн.