Доруобуйа Уопсастыба Үөрэх уонна наука

Үөрэх управлениетын начаалынньыга Алексей Семенов ыйытыыларга хоруйдаата

Дьокуускай куорат уокуругун үөрэххэ управлениетын начаалынньыга Алексей Семенов Инстаграм нөҥүө быһа сибээскэ тахсан, 1 кылааска киирэр оҕолордоох дьон ыйытыыларыгар хоруйдаата. Ханнык ыйытыылар киирдилэр?

edersaas.ru

Ыйытыы: Бастакы кылааска киирэргэ сайабылыанньаны ылыы хаһааҥҥыттан саҕаланарый?

Хоруй: РФ Үөрэҕириигэ министиэристибэтин саҥа бэрээдэгинэн, докумуону тутуу муус устар 1 күнүттэн саҕаланар.

Ыйытыы: Сайабылыанньаны хайдах биэриэххэ сөбүй?

Хоруй: Биллэн турар, бэрээдэк быһыытынан үөрэх порталын нөҥүө, эбэтэр оскуолаҕа бэйэтигэр баран, эбэтэр электроннай почтанан ыытыахха сөп. Дьокуускай куорат киинигэр турар оскуолалар олус улахан ноҕоруускалаахтар. Онон сайабылыанньаны СӨ үөрэҕин өҥөтүн порталын https://edu.e-yakutia.ru/ нөҥүө биэрэр ордук. Куорат таһынааҕы элбэх үөрэнээччитэ суох оскуолаҕа бэйэтигэр даҕаны тиийэн  биэриэххитин сөп.

Ыйытыы: Сайабылыанньа ыытарга ханна бэлиэтэнэр (учетная запись) ирдэнэрий?

Хоруй: Судаарыстыбаннай өҥө (Госуслуга) порталыгар бигэргэтиини (наличие подтвержденной учетной записи ЕСИА Госуслуги) ааспыт буолуохтааххыт. Өскөтүн Судаарыстыбаннай өҥө порталыгар бэлиэтэммэтэх буоллаххытына, эрдэттэн киирэр ордук.

Ыйытыы: Дьиэ кэргэн куорат биир уһугар регистрациялаах, улахан оҕолоро куорат иккис уһугар баар оскуолаҕа үөрэнэр. Оччотугар кыра оҕолорун ханнык оскуолаҕа киллэриэхтэрин сөбүй?

Хоруй: Саҥа бэрээдэгинэн муус устартан сайабылыанньаны сыһыарыллыбыт территорияларынан биэрэллэр. Манна бастакы уочаракка хапсар төрөппүттэр (первоочередники), чэпчэтиинэн туһанар араҥа (льготная категория), улахан оҕолоро тустаах оскуолаҕа үөрэнэр дьон киирсэллэр. Балар сайабылыанньаларын муус устар 1 күнүттэн биэриэхтэрин сөп.

Ыйытыы: Өскөтүн куорат тустаах түөлбэтигэр (район) олорбот буоллуннар, оччотугар хаһан биэрэллэрий?   

Хоруй: Үөһэ ыйыллыбыт дьонтон (бастакы поток) бэс ыйын 30 күнүгэр диэри сайабылыанньаны ылабыт. Ити кэнниттэн үс күн иһигэр оскуола оҕолору ыларын туһунан бирикээһэ тахсар. Онтон салҕыы хаалбыт миэстэлэргэ сайабылыанньаны ылыы саҕаланар.

Ыйытыы: Территориянан ханнык оскуолаҕа хапсарбытын хантан билиэхпитин сөбүй?

Хоруй: Сотору Дьокуускай куорат уокуругун баһылыгын дьаһала бигэргэтиллиэхтээх. Саҥа оскуолалар тутулуннулар. Онон испииһэккэ эбии киирэн биэриэхтэрэ. Биир-икки нэдиэлэ иһинэн тустаах докумуон тахсыахтаах. Дьокуускай куорат уокуругун дьаһалтатын уонна Үөрэх управлениетын саайтыгар билиһиннэриэхпит.

Ыйытыы: 1-гы кылааска киирэргэ сайабылыанньа биэрэргэ ханнык докумуоннар ирдэнэллэрий?

Хоруй: төрөппүтү (сокуоннай бэрэстэбиитэл) туоһулуур докумуон (документ удостоверяющий личность); өскөтүн сокуоннай бэрэстэбиитэл буоллаҕына эппэкиин эбэтэр көрөөччү (опекун или попечитель) буоларын туоһулуур докумуон; оҕо төрөөбүтүн туһунан сибэдиэтэлистибэтэ; чэпчэтиинэн туһанар араҥа (льготная категория) буоллаҕына үлэтиттэн ону туоһулуур докумуон эбэтэр дастабырыанньа.

Ыйытыы: Куорат 203-с түөлбэтигэр аһыллар саҥа оскуола ханнык хайысхалаах буолуоҕай?

Хоруй: Уопсай үөрэхтээһин оскуолата –гимназия. Билигин үөрэх былаанын оҥороллор. Сайдыытын бырагырааматыгар поликультурнай үөрэхтээһин туһунан этиллэр – “Центр глобального образования”. Манна олорор сирдэринэн хапсар (203-с түөлбэ) эрэ оҕолор үөрэниэхтэрэ.

Ыйытыы: Докумуону биэрэргэ кылаас салайааччытын талыахха сөп дуо?

Хоруй: Оннук кыаллыбат. Оскуола бэйэтэ быһаарар.

Быйыл 128 нууччалыы, 54 сахалыы тыллаах кылааһы арыйары былаанныыбыт. Ол эрээри, бу былааны чопчу толорор кыаллыбат. Биир кылааска нуорманы таһынан элбэх оҕону ылар табыллыбат.

Ыйытыы: Икки оскуолаҕа тэҥинэн сайабылыанньа биэрэр көҥүллэнэр дуо?

Хоруй: Сайабылыанньаны биир эрэ оскуолаҕа бэриллэр. Иккис сайабылыанньа биэрэр буоллаххытына от ыйын 6 күнүн кэнниттэн биирдэ бэриллэр.

Ыйытыы: Биһиги олорор сирбитинэн сөп түбэһэр оскуолабытыгар сахалыы тыллаах кылаас суох буоллаҕына хайдах гынабыт?

Хоруй: Сайабылыанньаҕытын биэрэҕит. Өскөтүн тустаах оскуолаҕа сахалыы тыллаах кылааска оҕобун үөрэттэриэм этэ диэн элбэх төрөппүттэн сайабылыанньа киирдэҕинэ, былааны таһынан, сахалыы тыллаах эбии кылааһы аһыахтарын сөп. Куоракка сахалыы кылаас ахсаана сыллата эбиллэ турар.

Ыйытыы: Чопчу оскуолаҕа хас кылаас уонна ханнык кылаастар аһыллалларын хантан билиэххэ сөбүй?

Хоруй: Хас кылаас аһыллара былааннанарын Үөрэх управлениетын саайтыгар таһаарыахпытын сөп. Оҕотун ханнык тылынан үөрэтиэн баҕарарын төрөппүт сайабылыанньатыгар ыйар.

Үөрэх управлениетын начаалынньыгыттан сүрүннээн ити курдук хабааннаах ыйытыылар киирдилэр. Чопчулаһар түгэҥҥитигэр үөрэх управлениетыгар 34-35-17 нүөмэринэн билсиэххитин сөп.

 

Людмила ПОПОВА, “Саха сирэ” хаһыат, edersaas.ru

0
0
Telegram @edersaas20

Добавить комментарий