Бэҕэһээ Ил Дархан Егор Борисов үөрэх эйгэтин үлэһиттэригэр саҥа миниистири Владимир Егоровы билиһиннэрдэ.
Бу иннинэ үөрэх уонна профессиональнай үөрэх министиэристибэлэрэ тус-туспа салаа эбит буоллахтарына, мантан инньэ Ил Дархан ыйааҕынан СӨ Үөрэҕин уонна наукатын министиэристибэтэ диэн ааттанна. Итиэннэ миниистиринэн В.А.Егоров ананна. Кылгастык билиһиннэрдэххэ, Владимир Анатольевич 1966 сыллаахха Сунтаарга төрөөбүт. 1988 сыллаахха М.Ломоносов аатынан Москватааҕы судаарыстыбаннай университет механика-математика бакылтыатын бүтэрбит. 1991 сыллаахха физика-математика наукатын хандьыдаата буолбут. 1991-1995 сс. атомнай станцияларга үлэһиттэри бэлэмниир Смоленскайдааҕы үөрэтэр-эрчийэр кииҥҥэ математигынан үлэлээбит. 1996 сылтан ыла дойдутуттан тэлэһийбэккэ, маҥнай СГУ-ка (ХИФУ) доценынан, “Ленскэй кыраай” форум генеральнай дириэктэринэн, “СӨ наукаларын аччыгый академията” ГАТ ректорынан үлэлээбитэ.
Ил Дархан Егор Борисов Владимир Анатольевич үөрэх, наука эйгэтигэр үгүс уопуттааҕын бэлиэтээтэ. Онон икки министиэристибэлэр холбоһууларын үлэтин чугас кэминэн үмүрүтэригэр эттэ. Үөрэх эйгэтигэр учуутал хамнаһыттан саҕалаан оскуолалары тутууга тиийэ үгүс кыһалҕалар баалларын ыйда. Итиэннэ учуутал статуһун үрдүктүк тутар, үүнэр ыччат майгы-сигили өттүнэн күүстээх буоларын туһугар улахан үлэ эрэйиллэрин иһитиннэрдэ.
Түмүккэ Ил Дархан урукку үөрэх миниистиригэр Феодосия Габышеваҕа уонна профессиональнай үөрэх миниистиригэр Михаил Присяжнайга бу сыллар тухары бэриниилээхтик, таһаарыылаахтык үлэлээбиттэригэр махтанна. Маны сэргэ Ил Дархан үөрэх миниистирин солбуйааччынан олорбут Василий Гуляев СӨ Ил Дарханын уонна бырабыыталыстыбатын ис политикаҕа департаменын салайааччытынан барарын иһитиннэрдэ. Салгыы манна аах: «Ис бэлиитикэни историк сүрүннүөҕэ».
Людмила ПОПОВА.