Бүгүҥҥүттэн СӨ үөрэҕин уонна наукатын үлэһиттэрин олунньутааҕы мунньахтара саҕаланна. Мунньах олунньу 6-8 күннэригэр ыытыллыаҕа. Тэрээһиҥҥэ быыстапка көрдөрүүтүттэн саҕалаан, үөрэх, наука эйгэтигэр баар кыһалҕаларга тиийэ кэпсэтиэхтэрэ.
>
Людмила Попова, “Саха сирэ”, https://edersaas.ru/
Мунньах чэрчитинэн, араас семинардар, “төгүрүк остуоллар”, үлэһиттэр идэлэрин таһымын үрдэтэр куурустар ыытыллыахтара, уопут атастаһыахтара итиэннэ инники соруктарын торумнуохтара.
Педагогтар, наука үлэһиттэрэ түмсүбүччэ бүгүҥҥү күҥҥэ тирээн турар сүрүн боппуруостары быһаарсыахтара. Ол курдук, оскуоланы бүтэрээри сылдьар үөрэнээччилэр судаарыстыбаннай түмүктүүр аттестацияларын, агро-оскуолалар үлэлэрин көдьүүһүн сыаналыыр ирдэбиллэри, кэтээн көрүүгэ олоҕуран оробуочай идэлэргэ бэлэмнээһин хаачыстыбатын хааччыйыы, инклюзивнай үөрэхтээһин, уо.д.а. боппуруостарын таарыйыахтара.
Оскуоланы бүтэрээри сылдьар оҕолорго уонна төрөппүттэргэ чопчу биир күнү — олунньу 8 күнүн анаатылар. Бу күн биир кэлим эксээмэн (ЕГЭ), уопсай судаарыстыбаннай эксээмэн (ОГЭ), бүтүн Россиятааҕы бэрэбиэркэлиир үлэ (ВПР) туһунан ким баҕалаах барыта кэлэн, сиһилии билсиэн сөп. Аан бастакытын төрөппүттэр баҕа өттүнэн кэлэн, биир кэлим эксээмэни (ЕГЭ) бэйэлэринэн туттаран көрүөхтэрэ. Тэрээһин бырагыраамата СӨ Үөрэҕин уонна наукатын министиэристибэтин сайтыгар баар.
Людмила Попова, “Саха сирэ”, https://edersaas.ru/
Мария Васильева (СИА) хаартыскаҕа түһэриитэ.