Үөрэх тэрилтэлэрэ бэйэлэрэ хаһаайыстыба тэринэллэригэр көҕүлүүллэр

Ааптар: 
Бөлөххө киир:

Саха сирин уһуйааннара, оскуолалара, орто анал үөрэх тэрилтэлэрэ бэйэлэрэ хаһаайыстыба тэринэн оҕуруот үүннэрэллэригэр этии киллэрбиттэр. Күн бүгүн Саха сирин оскуолатын үөрэнээччилэрин 98 бырыһыана итии аһылыгынан хааччыллар.

edersaas.ru

“Быйылгыттан үөрэх бары тэрилтэлэрэ – уһуйааннар, оскуолалар, орто анал үөрэхтэр тэлгэһэлэрин аттынааҕы хаһаайыстыбанан (приусадебные хозяйства) дьарыктаналларын көҕүлүүбүт. Билигин сорох агро хайысхата да суох оскуолалар, сылы эргиччи үөрэнээччилэрин, ону ааһан аттынааҕы уһуйааннарын оҕуруот аһынан хааччыйаллар. Оҕуруот аһын бэйэлэрэ үүннэрэр, атыылыыр орто үөрэх тэрилтэлэрэ эмиэ бааллар. Быйылгыттан бу хайысханы күүһүрдүөхтээхпит. Маныаха баһылыктар сир учаастактарын көрөллөрө суолталаах”, — диэн СӨ үөрэҕин уонна билимин миниистирэ Ирина Любимова пресс-кэмпириэнсийэ кэмигэр эттэ.

Сорох хотугу, ыраах сэлиэнньэлэр оскуолаларыгар буфет систиэмэтэ үлэлиир эбэтэр  элбэхтик ыалдьар, тымныы күннэргэ дьиэҕэ олорор кэмнэригэр оҕолор итии аһылыгынан хааччыллыбаттар. Саха сирин үөрэҕин тэрилтэлэригэр аһы-үөлү 1856 тиэрдээччи уонна 44 аутсорины тэрийээччи баарын иһитиннэрдэ.

Номнуо үһүс сылын алын кылаастары итии аһылыгынан хааччыйыыга сыллата 1 млрд. солк. тахса федеральнай үбүлээһин көрүллэр. Онтон 5-11-с кылаастары аһатыыны улуустар хааччыйаллар. Күҥҥэ оҕоҕо нуорма быһыытынынан хотугу эргимтэ иһигэр 80 солк., хотугу эргимтэ таһыгар 90 солк. быһыллыбыта. Нормативы булгуччу толоруохтаахтар.

Хас биирдии улуус араастык быһаарар. Холобур, Үөһээ Бүлүү, Миринэй улуустара олоччу босхо аһатан олороллор. Толору босхо аһатар кыахтара суох улуустар эмиэ бааллар. Балаһыанньа быһыытынан чэпчэтиинэн туһанааччылар – кыра дохуоттаах, инбэлиит оҕолор, ОВЗ-лаах оҕолор, ону тэҥэ, дьиэлэригэр үөрэнэр оҕолор босхо аһыахтаахтар.

Ордук Дьокуускай куорат үөрэнээччилэрин төрөппүттэрэ тоҕо сухуой бойуок суоҕуй диэн ыйыталаспыттара. Өссө төгүл быһааран этэбин – маны муниципальнай тэриллии бэйэтэ быһаарыахтаах. Бу үөрэх көрүҥүттэн эмиэ тутулуктаах. Хас нэдиэлэ (икки дуу, үс дуу) тэйиччиттэн олорон үөрэннэхтэринэ сухуой бойуок көрүллэрин муниципальнай тэриллии бэйэтэ ыйар”, — диэн миниистир быһаарда.

Кэлин аһылык сыанатын туһунан элбэхтэ ахтыллар, күн-түүн үрдүү турар. “Биһиги эмиэ бэйэбит мэхэниисими, быһаарыылары толкуйдуохтаахпыт. Төһө кыалларынан олохтоох аһылыгы сиэхтээхпит. Бастакытынан, Арктика, хотугу улуустарга сыана үрдүк. Иккиһинэн, олохтоох бородууксуйа суоҕун тэҥэ эбэтэр аҕыйах. Онон аукцион ыытан эрэгийиэн таһыттан чэпчэки сыаналаах эти, үүтү аҕалтараллар. Бу туһунан эмиэ элбэхтик кэпсэтэбит. Маныаха саҥа бырайыагы толкуйдаатыбыт. Арктика, хоту улуустар киин улуустар бааһынай хаһаайыстыбаларын кытта дуогабар түһэрсэллэригэр этии киллэрэбит. Холобур, Чурапчы улууһун оскуолалаларын уруккуттан олохтоох тыа хаһаайыстыбатын кэпэрэтиибэ этинэн хааччыйар. Онон, бастатан туран, үөрэх тэрилтэлэрин олохтоох  бородууксуйанан хааччыйыыга болҕомто ууруохтаахпыт, — диэн ыйар.

Людмила ПОПОВА, “Саха сирэ” хаһыат, edersaas.ru

Хаартыска: СИА

+1
0
+1
0
+1
0
+1
0
+1
0
+1
0
+1
0