Үөрэх саҥардыллыбыт ыстандаарта уонна төрөөбүт тыл туһунан

Ааптар: 
Бөлөххө киир:

Быйылгыттан саҥардыллыбыт федеральнай судаарыстыбаннай үөрэх ыстандаарта (ФГОС) олоххо киирэр. Саҥардыллыбыт ыстандаартынан төрөөбүт тылы, литэрэтиирэни үөрэтии чааһа аҕыйаан, Саха сирин сэргэ атын даҕаны төрүт тыллаах өрөспүүбүлүкэлэргэ былырыын-быйыл улахан кэпсэтиилэр, ырытыһыылар тахсыбыттара. Саха сиригэр, бэл, соҕурууттан бөлөх кэлэн үлэлээн барбыта.

edersaas.ru

Үөрэх үлэһиттэрин атырдьах ыйынааҕы мунньаҕар кэккэ боппуруостары сэргэ төрөөбүт тылы үөрэтиигэ эмиэ тохтоон аастылар.

Ил Түмэн билимҥэ, үөрэххэ, култуураҕа, иһитиннэриилэри киэҥник тарҕатар сириэстибэлэргэ уонна уопсастыбаннай тэрилтэлэр дьыалаларыгар сис кэмитиэтин бэрэссэдээтэлэ Феодосия Габышева суруналыыстар ыйытыыларыгар хоруйдууругар: «Үөрэх федеральнай судаарыстыбаннай ыстандаарта былырыын ылыллыбыта. Ол гынан баран, биһиги өрөспүүбүлүкэбит уонна атын даҕаны субъектар туруорсууларынан, ордук төрөөбүт тылы үөрэтиинэн сибээстээн саҥардылынна. Көннөрүллүбүт дьаһала бирикээс быһыытынан таҕыста. Бу ыстандаарт атырдьах ыйын 28 күнүттэн үлэҕэ киирэр. Биһиги чаас боппуруоһун туруорсубуппут. Чаас көрүлүннэ. Ол гынан баран, эбии мэхэниисимнэр баар буоллулар. Ол курдук, 5-9 кылаас үөрэнээччилэригэр “Основы духовно-нравственной культуры народов РФ” диэн саҥа биридимиэт баар буолла. Быйыл ыстандаарт 1-5 кылаастарга киирэр. Уратыта диэн төрөөбүт тылга бөлөҕүнэн араарыыны көрдүлэр. Бу эмиэ улахан, өр сыллаах туруорсуу түмүгэ диэн бэлиэтиир оруннаах. Онон төрөөбүт тылы үчүгэйдик баһылаабатах оҕолорго уонна төрөөбүт тылы дириҥник билэр оҕолорго тус-туспа бөлөхтөр тэриллэр буоллулар. Үөрэх кэнниттэн эбии дьарыктар (продленнай группа) баар буолуулара эйгэни тэрийиигэ эмиэ улахан суолталаах. Чааһы үөрэх тэрилтэтэ син биир бэйэтэ быһаарар», — диэн быһаарда.

СӨ үөрэҕин уонна билимин миниистирэ Ирина Любимова:

— Алын уонна сүрүн уопсай үөрэх ыстандаартыгар (ФГОС) уларыйыылар киирдилэр, ол иһигэр, СанПиҥҥа олоҕуран, алын кылаастарга 3190 чаастан 3345 чааска диэри, сүрүн оскуолаҕа – 5549 чаастан 5848 чааска диэри аудиторнай үлэ кээмэйин эптилэр.  Чааһы эбии “Төрөөбүт тыл”, “Төрөөбүт тылынан ааҕыы”, “Төрөөбүт литэрэтиирэ” биридимиэттэр барыллаан бырагыраамаларын толору уонна хаачыстыбалаахтык олоххо киллэрэр кыаҕы биэрэр. Онон чааһы үллэрии уустуктара быһаарылыннылар, — диэн миниистир чопчулаата.

Людмила ПОПОВА, “Саха сирэ” хаһыат, edersaas.ru

+1
0
+1
0
+1
0
+1
0
+1
0
+1
0
+1
0