“Үөрэх” национальнай бырайыак: 31-с нүөмэрдээх оскуола дьиэтин астылар
Дьокуускай куорат 31-с нүөмэрдээх оскуолатын саҥа дьиэтин астылар. 315 миэстэлээх салҕааһыны, “Үөрэх” национальнай бырайыак иитинэн туттулар.
Саҥа дьиэ тутуутун боппуруоһун оскуола кэлэктиибэ уонна төрөппүттэр хас даҕаны сыл устата туруорсубуттара. 2017 сыллаахха бырайыактыыр-симиэтэтин ааҕар докумуона саҕаламмыта. Тутуу бастакы атаҕын 2019 сыл балаҕан ыйыгар түһэрбиттэрэ. Оскуоланы, дойду бэрэсидьиэнэ Владимир Путин көҕүлээһининэн олоххо киирбит “Үөрэх” национальнай бырайыагынан, “СТК” хампаанньа тутта. Федеральнай хааһынаттан 245 мөлүйүөн солкуобай, эрэгийиэн бүддьүөтүттэн 105 мөлүйүөн солкуобай тыырыллыбыта.
Учууталлары, үөрэнээччилэри уонна төрөппүттэри Айсен Николаев эҕэрдэлээтэ. “31-с оскуола бу – өрөспүүбүлүкэбит саамай улахан оскуолата. Манна 2400 оҕо үөрэнэр. Дириэктэр Валентина Юрьевнаҕа, бары кэлэктиипкэ үөрэх хаамыытыгар айымньылаах сыһыаҥҥыт, аныгылыы көрүүгүт иһин махталбын биллэрэбин. Саҥа тутуу оҕолор өссө сайдалларыгар, бэйэлэрин үлэлэринэн өрөспүүбүлүкэни ааттатар үтүө дьон үүнэн тахсарыгар эрэнэбин”, — диэн Ил Дархан эттэ. Итиэннэ саҥа кинигэ ыларга оскуолаҕа сэртипикээти туттарда.
Айсен Николаевы сэргэ Дьокуускайга командировкаҕа кэлэ сылдьар РФ үөрэҕириигэ миниистирин бастакы солбуйааччы Дмитрий Глушко эҕэрдэлээтэ.
“Бүгүн — улахан бырааһынньык. Дьокуускай куорат 31-с нүөмэрдээх оскуолатын саҥа дьиэтин аһабыт. “Үөрэх” национальнай бырайыак иитинэн дойду үрдүнэн элбэх эбийиэк тутуллар. Биһиги иннибитигэр турар соруктартан биирдэстэринэн — оскуолаларга үөрэнээччи ахсаана элбээһинин соругун быһаарыы буолар. Кылааска үөрэнэр оҕо ахсаана нуорманы таһынан барбатын ситиһиэхтээхпит. Педагогтар үлэлииллэригэр, оҕолор үөрэнэллэригэр, хас биирдии оҕо талаана арылларыгар сөптөөх усулуобуйаны олохтооһун улахан суолталаах”, — диэн Глушко эттэ.
Үөрүүлээх тэрээһиҥҥэ Дьокуускай куорат баһылыгын эбээһинэһин толорооччу Евгений Григорьев тыл эттэ. Кини “Үөрэх” национальнай бырайыак иитинэн куоракка үөрэх систиэмэтин сайдыытын, тэрээһиннэри ыытыыны өйдүүллэрин иһин федеральнай уонна эрэгийиэннээҕи салалтаҕа махтанна.
“Пандемия уонна да атын уустуктар баалларын үрдүнэн, куорат биир бастыҥ оскуолатын аныгы дьиэтэ кылгас кэм иһигэр тутулунна. Салҕааһын тутуллан, оскуола салгыы сайдарыгар, тупсан иһэригэр эрэнэбин”, — диэн Григорьев бэлиэтээтэ.
Оскуола дириэктэрэ Валентина Рыбкина оскуоланы көрдөрдө. 4 276,82 кв. миэтэрэ иэннээх үс мэндиэмэҥҥэ, үөрэнэр кылаастары, лабаратыарыйалары, мастарыскыайдары, буфеты, 30 тыһыынча кинигэ хараллар бибилэтиэкэтин, спорт саалатын, тириэньэр хоһун, тиры олохтообуттар.
Оскуола салҕааһына 315 оҕоҕо суоттаммыт. Күн бүгүн тустаах оскуолаҕа 2 тыһыынчаттан тахса оҕо үөрэнэр. Бу куорат улахан оскуолаларыттан биирдэстэрэ буолар. 2020 сыллаахха дойду инники күөҥҥэ сылдьар үрдүк үөрэҕин кыһаларыгар киирбит үөрэнээччитин ахсаанынан өрөспүүбүлүкэҕэ бастыҥ оскуола, RFEX Уһук Илин мэдиссиинэҕэ 10 бастыҥ оскуолатын кэккэтигэр киирбитэ.
СӨ Ил Дарханын уонна Бырабыыталыстыбатын пресс-сулууспата.
Мария ВАСИЛЬЕВА (СИА) хаартыскаҕа түһэриилэрэ.