Ыраахтан олорон (дистанционно) үөрэнии кэмигэр оскуоланы бүтэрээччини, төрөппүттэри эксээмэн, Бүтүн Арассыыйатааҕы бэрэбиэркэлиир үлэ боппуруоһа улаханнык долгутар. Бүгүн СӨ Үөрэҕин уонна наукатын миниистирэ тустаах ыйытыыларга сиһилии хоруйдаата.
Ыйытыы: Бүтүн Арассыыйатааҕы бэрэбиэркэлиир үлэни хаһан туттаралларый?
Хоруй: Бүтүн Арассыыйатааҕы бэрэбиэркэлиир үлэ — сыл түмүгүнэн оҕолор үөрэх бырагырааматын төһө бэркэ үөрэппиттэрин бэрэбиэркэлиир аналлаах. Сыллааҕы түмүк сыанаҕа дьайбат. Кэлэр үөрэх дьылын саҥатыгар үөрэнээччилэр туохха ордук доҕолоҥнуулларын чинчийэр, саҥа үөрэх бырагырааматыгар киирэргэ төһө бэлэмнээхтэрин билэр соруктаах ыытыллыаҕа. Ол түмүгүнэн үөрэх хаамыытыгар чиҥэтиилэри киллэрэн биэриэхтэрэ.
Ыйытыы: Биир кэлим эксээмэн (ЕГЭ) хаһан буолуой?
Хоруй: Быйыл 8 тыһыынчаттан тахса оҕо бүтэрэр. Оскуоланы бүтэрээччилэр, төрөппүттэр даҕаны долгуйаллара өйдөнөр. РФ Үөрэҕириигэ министиэристибэтэ билигин араас барыйааннары үөрэтэр. Билиҥҥитэ биир кэлим эксээмэн (ЕГЭ) бэс ыйын 8 күнүттэн саҕаланыа диэн былааннанар. Салгыы быһаарыахтара. Баҕар, көһөрөн биэриэхтэрэ. Онон РФ Үөрэҕириигэ министиэристибэтин быһаарыытын күүтэбит. Миниистир Сергей Кравцов ыам ыйынааҕы бырааһынньыктар кэннилэриттэн биллиэҕэ диэн иһитиннэрбитэ.
Ыйытыы: Сүрүн судаарыстыбаннай эксээмэн (ОГЭ) хаһан буолуой?
Хоруй: Быйыл ОГЭ-ни РФ Үөрэҕириигэ министиэристибэтин уонна Рособрнадзору кытта сүбэлэһэн, эрэгийиэн хаһан ыытарын бэйэтэ быһаарар. Болдьоҕо бэс ыйын 8 күнүттэн от ыйын бүтүүтүгэр диэри ыйыллыбыта. Күн бүгүн барыллаан дааталары Рособрнадзору, дойду министиэристибэтин кытта сөбүлэһиннэрэ сылдьабыт. ОГЭ быйыл икки сүрүн биридимэккэ (математика уонна нуучча тыла) ыытыллар. Икки талар эксээмэни быйылгы тохсус кылаастар туттарымыахтарын сөп. Быйылгы ОГЭ араспысаанньата ыам ыйынааҕы бырааһынньыктар кэннилэриттэн биллиэҕэ.
Ол эрээри, былырыын 300 кэриҥэ оҕо талар эксээмэни кыайан ааспатаҕа. Билигин бу боппуруоска Рособрнадзору уонна РФ Үөрэҕириигэ министиэристибэтин кытта үлэлэһэ сылдьабыт. Хас даҕаны барыйаан баар буолуон сөп. Күн бүгүн чопчу быһаарылла илик.
Людмила ПОПОВА, edersaas.ru